Սպանության սխալ մեղադրանքով 23 տարի բանտում անցկացրած ամերիկացի Դեւիդ Ռենտան անմեղ է ճանաչվել: Այս մասին գրում է The Wall Street Journal-ը:

Բրուքլինի դատարանը 1991 թվականին 37 տարվա ազատազրկման էր դատապարտել Ռենտային: Հետաքննության տվյալներով, դրանից 1 տարի առաջ թանկարժեք իրեր տեղափոխող առաքիչին անհաջող կողոպտելու փորձից հետո սպանել է պատահական վկա հրեա րաբբի Հասկել Վերցբերգերին:

35-ամյա Ռանտան, ով այդ ժամանակ աշխատում էր տպագրության ոլորտում ու թմրանյութեր էր ընդունում, մեղավոր է ճանաչվել մի քանի վկաների ցուցմունքների հիման վրա: Ռանտան մշտապես հերքել է իր մեղքը եւ երկու անգամ բողոքարկել է վճիռը, սակայն մերժվել է:

2011 թվականի հետաքննությունը վերսկսվել է: Այդ ժամանակ իրենց ցուցմունքներից հրաժարավել էին վկաներից մի քանիսը: Նրանցից մեկը, ով 1990թ 13 տարեկան էր, պատմել է, որ իրեն քննիչներն են ստիպել ցուցմունք տալ: Ավելի ուշ ցուցմունքները հետ էին վերցրել եւս 2 հոգի: Հետաքննությունը ցույց է տվել, որ գործի քննության ընթացքում բազմաթիվ խախտումներ են թույլ տրվել:

Ներկայում Դեւիդ Ռենտան 58 տարեկան է: Ի դեպ, 2012 թվականին ամերիկյան երկու համալսարանների կողմից անցկացրած ուսումնասիրության ընթացքում պարզ է դարձել, որ սկսած 1989 թվականից բանտերից ազատ է արձակվել ավելի քան 2000 մարդ, ովքեր սխալմամբ են դատապարտվել: