Այսօր՝ հուլիսի 30-ին, արտառոց դեպք է տեղի ունեցել Արմավիրի մազրում: Ժամը 04:00-ի սահմաններում Արմավիրի բժշկական կենտրոնից ոստիկանության Արմավիրի բաժին հայտնել են, որ առանձնակի դաժանությամբ ծեծված վիճակում մարմնական բազմաթիվ վնասվածներով Նաիրի գյուղից (նախկին Հացիկ) իրենց մոտ է տեղափոխվել նույն գյուղի բնակիչ 77-ամյա Վերգուշ Սարգսյանը:

Ինչպես նշված գյուղից հայտնում է ֆոտոլրագրող Գագիկ Շամշյանը, Վ. Սարգսյանը, գիտակցության չգալով, առավոտյան մահացել է: 

Այս պահին դեպքի վայր են ժամանել ոստիկանության Արմավիրի բաժնի օպերատիվ խումբը՝ Արմավիրի ոստիկանապետ՝ Արամ Հովհաննիսյանի գլխավորությամբ: Տեղում են նաև ոստիկանության քննչական գլխավոր վարչության Արմավիրի մարզի քննչական բաժնի քննիչները:

Տան մոտ հավաքվածները ֆոտոլրագրողին պատմում էին, որ Վ. Սարգսյանին ծեծի է ենթարկել նրա տղան՝ 37-ամյա Վարդան Ստեփանյանը, ով ունի 2 անչափահաս տղաներ, սակայն ամեն անգամ կոնֆլիկտների մեջ է եղել նաև կնոջ հետ: Այդ պահին տանը եղել են ինքն ու մայրը: Իսկ Վ. Ստեփանյանը հաճախակի էր լինում ոչ սթափ վիճակում: 

Այս պահին ոստիկանությունը նշված հանցագործությունը կատարելու համար որպես կասկածյալ որոնում է Վ. Ստեփանյանին:

Փաստի առթիվ ոստիկանության Արմավիրի քննչական բաժնում նյութեր են նախապատրաստվում և դատաբժշկի փորձաքննության եզրակացությունը ստանալուց հետո քննչական մարմինը պետք է որոշի, թե քրեական գործը քրօրի որ հոդվածով է հարուցում՝ կամ ծեծ, որը կյանքի և առողջության համար վտանգ է ներկայացնում, կամ սպանություն: 

Այս պահին նշված վայր է ժամանել նաև գյուղապետ Արթուր Եղյազարյանը, ով դատապարտելով տեղի ունեցածը, ոստիկանների և գյուղացիների հետ փնտրում է կասկածյալին:

shamshyan.com