Հանգուցյալ Եվգենյա Թ.-ի թաղման արարողության ժամանակ մեծ ծեծկռտուք է առաջացել ամուսնու, որդու եւ ամուսնու եղբոր ընտանիքների միջեւ: Արագածոտնի մարզի ընդհանուր իրավասության դատարանից NEWS.am-ը տեղեկացավ, որ սույն գործը քննվել է նշված դատարանում:

Գործի նյութերի համաձայն՝ 57-ամյա Ֆելիքս Թ.-ին մեղադրանք է առաջադրվել այն բանի համար, որ նա Աշտարակ քաղաքի իր տանը, իր որդի Արսեն Թ.-ի հետ միասին կենցաղային հարցերի շուրջ վիճաբանել են Արթուր Թ.-ի եւ նրա կնոջ՝ Եվա Ղ.-ի հետ, որի ընթացքում Ֆելիքս Թ-ն դիտավորությամբ ձեռքերով եւ ոտքերով մի քանի անգամ հարվածել է Եվա Ղ.-ին:

53-ամյա Արթուր Թ.-ին էլ  մեղադրանք է առաջադրվել այն բանի համար, որ նա  կենցաղային հարցերի շուրջ վիճաբանել է Ֆելիքս Թ-ի եւ նրա որդի Արսեն Թ.-ի հետ, որի ընթացքում դիտավորությամբ ձեռքով հարվածել է Ֆելիքս Թ.-ին, պատճառել մարմնական վնասվածք:

28-ամյա Արսեն Թ.-ին էլ մեղադրանք է առաջադրվել այն բանի համար, որ նա  նույն վեճի ժամանակ փայտով դիտավորությամբ հարվածել է Արթուր Թ.-ին՝ պատճառելով մարմնական վնասվածք:

Քննելով գործը դատարանը պարզել է, որ ամբաստանյալներ Ֆելիքս Թ-ի եւ Արթուր Թ.-ի մայր` այժմ հանգուցյալ Եվգենյա Թումանյանն իրեն պատկանող գույքի մի մասը եւ ոսկյա զարդերը 2006-2007 թվականներին նվիրել է Ֆելիքս Թ.-ի ընտանիքին: Ֆելիքսն ու Արթուրը, լինելով հարազատ եղբայրներ, բնակվել են Աշտարակ քաղաքի Մուղնի թաղամասում անմիջական հարեւանությամբ եւ Արթուր Թ.-ն ու նրա կին Եվան նշված գույքի հետ կապված ունեցել են գույքային պահանջ: Նրանք այդ գույքի հետ կապված քաղաքացիական հայցով դիմել են դատարան, սակայն դատարանի կողմից կայացված որոշումը չի բավարարել նրանց, որի պատճառով Ֆելիքս Թ.-ի եւ Արթուր Թ.-ի եւ նրանց ընտանիքի անդամների միջեւ առաջացել են թշնամական հարաբերություններ:

Հատկանշական է, որ վռիվը տեղի է ունեցել նրանց մոր հուղարկավորության օրը:

Քննելով գործը դատարանը վճռել է Արսեն Թ.-ին մեղավոր ճանաչել ՀՀ քրեական օրենսգրքի 117-րդ հոդվածով եւ նրա նկատմամբ նշանակել պատիժ` կալանք 1 ամիս ժամկետով: Արթուր Թ-ին մեղավոր ճանաչել ՀՀ քրեական օրենսգրքի 117-րդ հոդվածով եւ նրա նկատմամբ նշանակել պատիժ` տուգանք նվազագույն աշխատավարձի վաթսունապատիկի` 60 հազար ՀՀ դրամի չափով: Ֆելիքս Թ.-ին մեղավոր են ճանաչել ՀՀ քրեական օրենսգրքի 118-րդ հոդվածով եւ նրա նկատմամբ նշանակել պատիժ` տուգանք  60  հազար ՀՀ դրամի չափով:

Դատավճիռը կարող է բողոքարկվել ՀՀ վերաքննիչ քրեական դատարան` մեկամսյա ժամկետում: