Երեկ՝ ապրիլի 7-ին, ավտովթար է տեղի ունեցել Լոռու մարզում: Ժամը 22:00-ի սահմաններում Վանաձոր-Գյումրի ավտոճանապարհի Լուսաղբյուր գյուղի հատվածում Գյումրի քաղաքի բնակիչ, 27-ամյա Յուրի Կեցեմոնյանը, վարելով «Գազ 52» մակնիշի 01 ԼՍ 749 համարանիշի ավտոմեքենան, բախվել է Գյումրիից դեպի Վանաձորի ուղղությամբ կայանված վիճակում գտնվող Վրաստանի Հանրապետության քաղաքացի, 33-ամյա Պետրոս Ասոյանին պատկանող «Mercedes» մակնիշի XLX 406 համարանիշի ավտոմեքենային: 

Ինչպես վթարի վայրից հայտնում է ֆոտոլրագրող Գագիկ Շամշյանը, բարեբախտաբար, զոհեր և վիրավորներ չկան, իսկ «Mercedes»-ը, հարվածի արդյունքում մոտ 100 մ կողաշրջվելով, հայտնվել է ձորով հոսող գետի մեջ: 

Վթարի վայրում «Mercedes»-ի վարորդ Պ. Ասոյանը ֆոտոլրագրողի հետ զրույցում պատմել է, որ «մեքենայի անիվն էի փոխում, երբ նկատեցի, որ բեռնատարը մեծ արագությամբ գալիս էր մեր կողմ, միայն հասցրեցի փախնել, որից հետո «Mercedes»-ը ճանապարհից շպրտվեց դեպի ձորը»: 

Վթարի վայր են ժամանել Ճանապարհային ոստիկանության 2-րդ սպայական գումարտակի 5-րդ վաշտի աշխատակիցները՝ վաշտի հրամանատար Վարդան Նարգիզյանի, հրամանատարի տեղակալ Մարտիկ Բալայանի գլխավորությամբ: 

Փաստի առթիվ նույն վաշտի հետաքննիչ Ստեփան Համբարյանի կողմից նյութեր են նախապատրաստվում: Կարճ ժամանակում վթարի վայր են ժամանել նաև ապահովագրական ընկերությունների ներկայացուցիչները:

shamshyan.com