Չէ, հասկանում եմ' մի քիչ ամաչում են, մի քիչ չեն հավատում, որ բան կփոխվի: Բայց սա թերևս միակ ոչ քաղաքական պայքարն է, երբ իսկապես միացել են անհանգստացած, նույնիսկ տարբեր քաղաքական դիրքորոշում ու հայացքներ ունեցող մարդիկ: Հարցեր կան, որ անմիջապես չեն առնչվում մարդկանց, իսկ սա ամենաուղղակի կապն ունի մարդկանց գրպանի, քաղաքացու իրավունքների հետ: Ուսանողության մեծ մասը չի աշխատում ու հիսուն տոկոսանոց թանկացում իրեն թույլ տալ չի կարող: Կամ, տեսե՞լ եք թոշակով ապրող տատիկ-պապիկներն ինչպես են դողդղացող ձեռքերով հանում 100 դրամը, հետո հիշում, որ ախր բարձրացել է և ավելացնում 50-ը: Մի մեծ բան չի՞, բայց իրենք այդ հիսուն դրամով ապրում էին: Ասենք, հարցը բոլորովին այլ է, ակցիային միացել են մարդիկ, ովքեր երբեք չեն երթևեկելու երթուղայիններով, մարդիկ` անձնական մեքենաներով, անձնական վարորդներով, սա ոչ թե 50 դրամի, այլ սեփական արժանապատվության, սեփական երկրին տեր լինելու պայքար է:
Իսկ հացի գնի թանկացման վերաբերյալ փորձեցինք խոսել Հայաստանի Սպառողների միության հետ, որևէ հեռախոսահամր, որ գրված էր Հայաստանի Սպառողների միության կայքում իրական չէր, իսկ կայքը չէր թարմացվել 2011թ-ից: Կամ 2011-ից ամեն ինչ այնքան լավ է,որ սպառողական որևէ խնդիր չենք ունեցել, կամ էլ …էս մեր երկրում ոչ մի բան իր տեղում չէ:

operativ.am