«Ժողովուրդ» թերթն անդրադարձել է մայիսի 25-ին Մալաթիա-Սեբաստիա վարչական շրջանի գյուղատնտեսական ապրանքների «Մալաթիա» տոնավաճառի տարածքում տեղի ունեցած դանակահարության թեմային` նշելով, որ վիճաբանություն է տեղի ունեցել մարտի 1-ի զոհերից Արմեն Ֆարմանյանի նախկին կնոջ` Աննա Էլոյանի և նրա երկրորդ ամուսնու` Հովնան Խաչատրյանի միջև:

Վիճաբանությունն այն աստիճան է սրվել, որ Աննան դանակով երեք անգամ հարվածել է Հովնանին:

Թերթը գրում է, որ իրենք բազմիցս անդրադարձել են «Մալաթիա» տոնավաճառի տարածքում տեղակայված տաղավարներում աշխատողներն զբաղված են հարբեցողությամբ, որն էլ պատճառ է հանդիսանում այստեղ հաճախակի վեճերի:

Թղթակիցն այցելել է տոնավաճառ և զրուցել աշխատակիցների հետ: Նրանցից մեկն ասել է, որ Աննան ինչ-որ բաներ է լսել ամուսնու մասին, սակայն թղթակցի զրուցակիցը չի մանրամասնել, թե` ինչ:

Նույն հարցի կապակցությամբ` թղթակիցը զրուցել է նաև Հովնանի մորաքրոջ աղջկա` Կարինե Գալստյանի հետ, ում հետ էլ ապրում են Աննան և Հովնանը:

Նա մասնավորապես ասել է. «Աննան լսել էր, թե Հովնանն ինչ որ աղջիկների հետ է կապված, նրան բռնացրել էր ու դանակահարել»:

Թղթակիցը զրուցել է նաև Աննայի հետ, ով պատմել է, որ ըստ ականատեսների` Հովնանը տոնավաճառի տարածքում մարմնավաճառների հետ մշտապես ժամանակ է անցկացրել:

Որոշել է անձամբ ստուգել. «Գիշերը` ժամը 24:00-ի սահմաններում էր, գնացի Մալաթիայի տոնավաճառի մոտ ու տեսա այդ մարմնավաճառներին Հովնանի հետ: Ասի` արի գնանք տուն, Հովնանն էլ խմած էր, չենթարկվեց ինձ, սկսեցի ներվայնանալ: Քանի որ ես շուկայում միրգ եմ վաճառում, մի փոքրիկ դանակ ունեմ մոտս, այն միշտ գրպանս գցած է: Միրգ եմ կտրում, որ հաճախորդներս համը տեսնեն: Այդ փոքրիկ դանակով հարվածեցի»: