Ֆրանսիական Օշ քաղաքի Ժեր թաղամասի վարչությունում հրաժարվել են հայ ընտանիքին աշխատանքի թույլտվություն եւ քաղաքական փախստականի կարգավիճակ տրամադրել: Այդ մասին գրում է ֆրանսիական «Sud Ouest»-ը: Մի քանի օր շարունակ երեքամյա Ելենան, նրա երկամյա եղբայր Արթուրը եւ նրանց ծնողներ Ռուզաննա եւ Ավետիս Մարկոսյանները գիշերում են ավտոմեքենայում, քանի որ Ֆրանսիայում ապաստարան ստանալու նրանց հայցը մերժվել է:

Մարկոսյանները Ֆրանսիա են եկել 2011թ.-ի հուլիսին: Ռուզանան այդ ժամանակ երեխայի էր սպասում: Եւ նա նույն օրը, երբ ոտք է դրել Ֆրանսիա, ծծնդաբերել է: Այնպես որ փոքրիկ Արթուրը ֆրանսիացի է: Սակայն նրա ավագ քույր ու ծնողները երկարատեւ ու ծանր պայքար են մղում, որպեսզի քաղաքական փախստականների կարգավիճակ ու բնակության իրավունք ստանան:Տարվա սկզբին Ռուզաննան, ով Հայաստանում բուժքույր է եղել, սակայն փաստաթղթեր չունենալու պատճառով Ֆրանսիայում չի կարող հաստատել մասնագիտական որակավորման առկայությունը, կարողացել է Օշում «Աղքատների կրտսեր քույրեր» կազմակերպությունում բուժքույրի օգնականի աշխատանք ստանալ: Սակայն հունիսին թաղապետարանը նրան աշխատանքի թույլտվություն չի տրամադրել: Աշխատելու եւ գումար վաստակելու հնարավորությունից զրկված Ռուզաննան ու նրա երեխաները չեն կարող տեղավորվել ապաստարաններում, առավել եւս չեն կարող բնակարան վարձակալել:

«Սա կարեւոր, բարդ ու դժվար հարց է, եւ մենք շատ ուշադիր ենք դրա նկատմամբ»,- «Sud Ouest» թերթին հայտնել է թաղապետարանի գլխավոր քարտուղար Քրիստիան Շասենը՝ մեկնաբանելով հայ ընտանիքի դրությունը, որը Փախստականների ու քաղաքացիություն չունեցող անձանց պաշտպանության ֆրանսիական գրասենյակի կողմից առաջին մերժումը ստանալուց հետո, մերժում էր ստացել Փախստականների իրավունքների ազգային հանձնաժողովի կողմից:«Ղեկավարությունն  անմարդկային կառույց չէ»,- հայտնել է թաղապետարանի գլխավոր քարտուղարը, ով Մարկոսյանների ընտանիքին խոստացել է ընդունել թաղապետարանում՝ նրանց խնդիրը քննարկելու համար: «Խոսքն արտաքսման մասին չէ: Մենք դեռ դրան չենք հասել, սակայն Մարկոսյանները սպառել են ապաստան ստանալու երկու տարի տեւող ժամկետը»,- նշել է Քրիստիան Շասենը: