Կառավարության մասնաշենքի 6-րդ հարկում գտնվող Կրթության եւ գիտության նախարարության պատշգամբից ցած նետված 22-ամյա Հայկ Հայրապետյանը մահվանից առաջ տանն ասել է, որ նշանվելու մտադրություն ունի: Այս մասինNEWS.am-ի թղթակցի հետ զրույցում ասաց Հայկի հայրը` Միշա Հայրապետյանը:  Նրա խոսքով, նրանք ողջունել են տղայի ցանկությունը եւ շատ ուրախացել, իսկ ավելի ուշ տեղեկացել են կատարվածի մասին: Հայկի հայը ասաց, որ տղայի մոտ ինքնասպանության հակումներ չի նկատել. «Չգիտեմ, չգիտեմ ես իմ տղայի մեջ նման բաներ ես չեմ տեսել»,- ասաց Հայկի հայրը: Նա նաեւ տեղեկացրեց, որ Հայկի համակուրսեցիները եկել են եւ հայտնել, որ իրենց հարցաքննության են հրավիրել:

Բացի այդ,  տղայի ոսկրածուծից նմուշ են վերցրել եւ այն հանձնել դատաբժշկական փորձաքննության:

Ավելի վաղ տեղեկացրել էինք, որ կառավարության մասնաշենքի 6-րդ հարկում գտնվող Կրթության եւ գիտության նախարարության պատշգամբից  նետվել է  22-ամյա Հայկ Հայրապետյանը, ով  բնապահպանության նախարարության աշխատակից էր: Բնապահպանության նախարարի մամուլի քարտուղար Հայկ Հակոբյանն էլ ասել էր, որ Հայկը  նախարարության աուդիտի բաժնի աշխատակից էր, ընդմիջումից 5 րոպե առաջ դուրս է եկել աշխատասենյակից եւ տեղի է  ունեցել դեպքը:  «Պարտաճանաչ աշխատակից է եղել, կոլեկտիվի կողմից սիրված, կոլեկտիվին նվիրված»,- ասել էր մամուլի քարտուղարը` հավելելով, որ աշխատակիցները նրա մոտ որեւէ կասկածելի բան չեն նկատել: