Slaq.am-ին նամակով դիմել է 27-ամյա Ռոզան:
«Իմ արտաքինի հետ կապված հայ տղաների բոլոր ռեպլիկներից արդեն զզվել եմ...նախկինում ծանր էի տանում, իսկ հիմա արդեն թքած ունեմ: ԹՔԱԾ ՈՒՆԵՄ բոլոր հետամնաց հայ տղաների վրա, որոնց հետաքրքրում է միայն աղջկա արտաքինը... նրանց մաղթում եմ իրենց պես դատարկ մի աղջկա, ով պարզապես իրենց համար տիկնիկ կլինի, ում կօգտագործեն, հետո էլ կհոգնեն...
Կմտածեք, կյանքից դառնացել եմ, բայց այդպես չէ...
Ուղիղ մեկ տարի համացանցով, իսկ հետո նաև հեռախոսով շփվում էի մի տղայի հետ, ով ապրում էր Գերմանիայում: Տանել չեմ կարողանում համացանցում լուսանկարներ տեղադրել, ուստի հանդես էի գալիս կեղծ լուսանկարի ներքո, նա ևս զերծ էր մնում իր անձնական լուսանկարները հրապարակելուց:
Ինձ միշտ ասում էր, որ իրեն չի հետաքրքրում իմ արտաքինը, քանի որ պաշտում է իմ հոգին...
Արտաքին գեղեցկությամբ չեմ փայլում, երբեք ինձ որևէ մեկը գեղեցիկ չի համարել, ուստի արտաքինիս հետ կապված դեռ մանկուց կոմպլեքսներ ունեմ:
Իմ և Հրաչի շփումը տևեց մի տարի. Չկար մի օր, որ օրական առնվազն 2 ժամ չզրուցեինք հեռախոսով, նա ինձ համար դարձել էր հարազատ մարդ, խոստովանում եմ` սիրում էի նրան` անձամբ չճանաչելով, նույնն էլ նա էր զգում իմ հանդեպ:
Ինձ հետ ամուսնանալու նպատակով (համենայնդեպս ինքն էր ինձ այդպես ասում) եկավ Հայաստան: Տեսնվեցինք ընդամենը մեկ անգամ, որից հետո նա անհետ կորավ...
Կասեք` պատճառն իմ արտաքինը չէ, բայց վստահաբար կասեմ, որ հենց դա է: Նա իսկապես շատ գեղեցիկ է, ինձնից բարձրահասակ, երևի տեսավ ինձ ու հիասթափվեց...