Իտալացի զինվորներին հրամայվել է իրենց մարմիններից հեռացնել բոլոր տեսանելի դաջվածքները, հատկապես նրանք, որ կհամարվեն սեքսիստական, ռասիստական կամ նեոֆաշիստական ուժերին համակրանք են արտահայտում:

Նոր ընդունված կանոնակարգային փոփոխությունների համաձայն կարգելվի նաև փիրսինգը, հայտնում է բրիտանական Telegraph-ը:

Զինված ուժերը ուշադրության տակ է վերցրել հատկապես այն տատուները, որոնք ունեն սեռական, ռասիստական, հակահրեական կամ կնոջը նվաստացնող բովանդակություն: Հրամանատարությանը հատկապես անհանգստացնում են քաղաքական աջ ծայրահեղական տատուները, որոնք կարող են վնասել իտալական զինված ուժերի իմիջին:

Նշվում է, որ «սադրիչ» դաջվածքները կարող են չհասկացվածության խնդիրներ առաջացնել այն երկրներում որտեղ դրանք չեն խրախուսվում «կրոնական կամ մշակութային պատճառներով»:

Իտալիան Եվրոպայում ամենամեծ բանակ ունեցող այն երկրներից մեկն է, որի զորքը, ՆԱՏՕ-ի ղեկավարությամբ, տեղակայված է Աֆղանստանում, իսկ Լիբանանում և Բալկաններում են գտնվում խաղաղապահների ջոկատները: