Կանադացի փոփ երգիչ Ջասթին Բիբերի անունը կրկին արևմտյան բոլոր լրատվամիջոցների առաջին էջերին է:

Ինչպես հաղորդում է բրիտանական Reuters գործակալությունը, դեռահաս աղջիկների կուռքը նախօրերին Լեհաստանում 10°C ցրտին  շրջել է կիսամերկ՝ ամաչեցնելով և զարմացնելով շրջապատին:

Երգիչը Լեհաստան էր այցելելել «Հավատա» խորագրով համերգային շրջագայության շրջանակում: Լրատվամիջոցների հաղորդմամբ՝ համերգներն անցել են շատ ջերմ մթնոլորտում և լեփ-լեցուն դահլիճներում: Հավանաբար հենց այդ ջերմությունն է երգչին «ստիպել» մերկանալ. ԱՄՆ վերադառնալիս երգիչը Լոձի օդանավակայան է ժամանել կիսամերկ՝  առանց վերնաշապակի, տաբատն էլ գոտկատեղից այնքան իջած է եղել, որ կիսավարտիքը գրեթե ամբողջությամբ երևացել է:

Երգչին չեն ամաչեցրել ոչ տարօրինակ հայացքները, ոչ էլ  քչփչոցները: Նա ազատ շրջել է օդանավակայանի տարածքում, ապա նստել է ինքնաթիռ:

Հավելենք, որ 19-ամյա երգիչը ժամանակ առ ժամանակ սկանդալների կենտրոնում է հայտնվում. շաբաթներ առաջ նա երկու ժամով ուշացել էր համերգից, հետո էլ շոուի ժամանակ գիտակցությունը կորցրել: Դրանից հետո տեղեկություն  տարածվեց, որ Բիբերը կախվածություն ունի թմրանյութից, իսկ այսօր հայտնի դարձավ նաև, որ նա օրեր առաջ «լավ վիճել է» Լոս Անջելեսի իր առանձնատան հարևանների հետ: Հարևանները դիմել են ոստիկանություն ու պնդում են, որ երգիչը նույնիսկ հարձակվել է իրենց վրա, հայհոյել է, սպառնացել ու հարվածել: Թե ինչն է եղել պատճառը, չի հաղորդվում: Հետաքննությունը կատարվում է: