Ժաննա Ֆրիսկեն ռուսական շոու-բիզնեսի այն եզակի երգչուհիներից է, որի նկատմամբ հետաքրքրությունը երբեք չի նվազում, անկախ նրանից` նա նոր երգեր թողարկում է, թե ոչ: Ռուսական լրատվամիջոցները մեծ ոգեւորությամբ մանրամասներ են հրապարակել նրա կյանքի մասին, քանի որ Ժաննայի հայրն առաջին անգամ հրապարակային հարցազրույցով է հանդես եկել: Մինչ այդ Ֆրիսկեի ընտանիքի մասին քիչ բան էր հայտնի մամուլին, տարիներ առաջ նա հանրությանը ներկայացրեց իր քրոջը` Նատաշային, ով պիտի փոխարիներ նրան «Բլեստյաշչիե» խմբում, որտեղ Ժաննան սկսել է իր կարիերան: Սակայն Նատաշան նույնպիսի հաջողություն չունեցավ, ինչ Ժաննան: Հայտնի երգչուհու հայրը` Վլադիմիր Բորիսովիչը, կայացած գործարար է, անգամ սեփական հյուրանոց ունի բիզնեսում:

Նրա տված առաջին հարցազրույցից տեղեկանում ենք, որ գործարարը ֆինանսապես չի օգնել դստերը հայտնի դառնալու համար, պարզապես մեքենա եւ բնակարան է գնել նրա համար, իսկ մնացածին Ժաննան ինքնուրույն է հասել: Բորիսովիչը մեկ այլ հետաքրքիր միջադեպ է պատմել դստեր կյանքից: Տարիներ առաջ, երբ Ժաննան դեռ «Բլեստյաշչիե» խմբում էր հանդես գալիս, նրա դեմ խուլիգանական հարձակում է կազմակերպվել: Երբ երգչուհին դուրս է եկել վերելակից, նրա վրա են հարձակվել երկու հոգի, ծեծի են ենթարկել, ապա, քարշ տալով Ժաննային իր իսկ բնակարան` թալանել են նրա թանկարժեք զարդերը: Այս միջադեպից հետո Ժաննան առավել զգուշավոր եւ զգոն է դարձել: Երգչուհու ծնողները երազում են թոռան մասին, սակայն Ժաննան դեռ չի պատրաստվում մայրանալ, ներկայումս նա իր ուժերն է փորձում որպես հաղորդավարուհի՝ Մեքսիկայում: Տխրում է հատկապես Ժաննայի մայրը, ով անհանգստանում է, որ դուստրն այդքան հեռու է իրենցից:

hraparak.am