Playboy ամսագիրն առաջին անգամ կթողարկի մի համար, որի էջերին մերկ կանանց փոխարեն կլինեն ժամանակակից նկարիչների ստեղծագործություններ։ Հղում կատարելով The Independent- ին՝  Lenta.RU –ն հայտնում է, որ հունվար-փետրվար ամիսների այս համարը կկոչվի «Փլեյմեյթը որպես արվեստ» (փլեյմեյթ Playboy – ում կոչվում է հակառակ երեսին պատկերված աղջիկը), որտեղ իրենց տեղը կգտնեն յոթ ժամանակակից նկարիչների աշխատանքներ, ինչպիսիք են Թրեյսի Էմինը, Սինդի Շերմանը, Ուիլ Քոթոնը, Ռիչարդ Փրինսն ու Ջիլ Մաջիդը։

Հիշեցնենք, որ Playboy – ը թողարկվում է 1953 թվականից։ Մերկ կանանց նկարներով էջերից բացի ամսագրում տպագրվում են նորաձեւության, սպորտի ու հանրահայտ մարդկանց մասին հոդվածներ, հրապարակվում են գրական ստեղծագործություններ. այնտեղ տպագրվել են Վլադիմիր Նաբոկովի, Ստանիսլավ Լեմի, Յան Ֆլեմինգի, Սթիվեն Քինգի եւ Արթուր Կլարկի պատմվածքները։