39-ամյա  Արմենուհի Խ.-ն ոստիկանության Վանաձորի բաժնում հաղորդում է տվել, որ սիրեկանն իր թմրամոլ ընկերներին ունեցած պարտքը մարելու համար իրեն դրդել է մարմնավաճառության: Լոռիի մարզի ընդհանուր իրավասության դատարանից NEWS.am-ը տեղեկացավ, որ սույն գործը քննվելու է իրենց մոտ:

Գործի նյութերի համաձայն՝ 39-ամյա  Արմենուհի Խ.-ին մեղադրանք է առաջադրվել այն բանի համար, որ նա ԱԱԾ Լոռիի մարզային վարչության Վանաձորի բաժնում սուտ հաղորդում է տվել այն մասին, որ  Վանաձոր քաղաքի բնակիչ Արեն Ս.-ն Թուրքիայի Ստամբուլ քաղաքում համատեղ բնակվելու ընթացքում իրեն հակել է թմրանյութի գործածման, նաեւ թմրավաճառներին ունեցած պարտքերը մարելու, ինչպես նաեւ գումար վաստակելու համար ստիպել է իրեն զբաղվել մարմնավաճառությամբ:

Քրեական գործ է հարուցվել ՀՀ քրեական օրենսգրքի 333 հոդվածի 2-րդ մասի 1-ին կետով` սուտ մատնություն, որը զուգորդվել է ծանր կամ առանձնապես ծանր հանցագործության մեջ մեղադրելով: Սույն հոդվածը պատժվում է ազատազրկմամբ առավելագույնը 5 տարի ժամկետով: Խափանման միջոց ընտրվել է ստորագրությամբ չհեռանալը: Գործը դատարան է ստացվել հունիսի 18-ին: Առաջիկայում կնշանակվի դատական քննության օրը: