32-ամյա Մետաքսյա Մ.-ին մեղադրանք է առաջադրվել այն բանի համար, որ նա մարմնավաճառներ` Արեւիկ Հ.-ի, Հայկանուշ Ն.-ի, Հեղինե Հ.-ի, ինչպես նաեւ անչափահաս հանդիսացող Հ. Մ-ի կողմից պոռնկությամբ զբաղվելու համար պարբերաբար տրամադրել է իր բնակարանը, ինչպես նաեւ գույքային օգուտ ստանալու նպատակով, վերջիններիս համար հաճախորդներ է մատակարարել: Աբովյանի ընդհանուր իրավասության դատարանից NEWS.am-ը տեղեկացավ, որ սույն գործը քննվել է իրենց մոտ: 

Մետաքսյա  Մ.-ն իրեն մեղավոր չի ճանաչել եւ ցուցմունք տվել այն մասին, որ մասնագիտությամբ վարսահարդար է եւ զբաղվում է իր մասնագիտությամբ: Նա նշել է, որ մանկուց սիրել է ընկերություն անել տղաների հետ եւ իր ընկերական շրջապատը հիմնականում տղաներ են, ինչի արդյունքում էլ հաճախ են տղաները նրան հյուրընկալվել:

Անչափահաս Հ. Մ-ն ցուցմունք է տվել այն մասին, որ ոմն Հայկուհու միջոցով ծանոթացել է վարսահարդար Մետաքսյա Մ.-ի հետ: Վարսերը հարդարելու նպատակով, մոր հետ գնացել է Մետաքսյայի տուն, որտեղ գտնվել է նաեւ Հայկուհին:

Մետաքսյան իրեն ասել է, որ տեղյակ է իր անցյալի մասին, նաեւ տեղյակ է, որ ֆինանսական ծանր պայմաններում է գտնվում, ուստի իրեն համոզել է, որ գա իր տանն ապրի, ասելով, որ շատ ծանոթ տղաներ ունի, որոնց հետ գումարով սեռական հարաբերություն կունենաս, լավ կհագնվես, մազերդ միշտ հարդարված կլինի: Այդ ժամանակ ինքը եղել է 17 տարեկան, որի մասին հայտնել է նաեւ է Մետաքսյային, սակայն վերջինս իրեն ասել է, որ մինչեւ 18 տարին լրանալը գաղտնի կպահի այդ հանգամանքը եւ այդ մասին ոչ ոք չի իմանա:

Ինքը Մետաքսյային ասել է, որ մարմնավաճառությամբ չի զբաղվել, սակայն Մետաքսյան շարունակել է իրեն համոզել եւ առաջարկել է մտափոխվելու դեպքում գալ իր տուն: Ինքը համաձայնել է Մետաքսյայի առաջարկին եւ տեղափոխվել է նրա տուն, որտեղ ապրել է նաեւ Հայկուհին: Մետաքսյայի տուն տեղափոխվելուց հետո, հաջորդ օրը Մետաքսյայի տուն է գնացել մի տղամարդ, որը նրա ծանոթ, Արամուս գյուղի բնակիչ Արթուրն է եղել, որի հետ Մետաքսյայի տանը սեռական հարաբերություն է ունեցել եւ դրա դիմաց Մետաքսյան տվել է 5000 դրամ:

Դրանից մի քանի օր անց, Մետաքսյայի տուն է գնացել նրա ծանոթ, Գեղաշեն գյուղի բնակիչ Աշոտը, որի հետ տան ննջասենյակում նույնպես սեռական հարաբերություն է ունեցել, սակայն դրա դիմաց Մետաքսյան իրեն գումար չի տվել, ասելով, որ Աշոտը սուրճ է բերել դրա դիմաց:

Բացի դրանից, Մետաքսյան նախորոք պայմանավորվելով հաճախորդների հետ, իրեն տաքսիով ուղարկել է տարբեր հյուրանոցներ, սեռական հարաբերություն է ունեցել նրանց հետ եւ հաճախորդների տված գումարները բերել եւ տվել է Մետաքսյային, որի դիմաց Մետաքսյան իրեն ծխախոտով, ուտելիքով եւ հագուստով է ապահովել:

Մետաքսյայի պահանջով սեռական հարաբերություն է ունեցել ամսվա ընթացքում 25 օր, օրական 1-2 հաճախորդի հետ, 10.000-20.000 դրամ գումարով, որոնք միշտ բերել եւ տվել է Մետաքսյային: Այդ ամենը տեւել է 11 ամիս: Քննելով գործը դատարանը վճռել է Մետաքսյա Մ.-ին մեղավոր ճանաչել ՀՀ քրեական օրենսգրքի 262-րդ հոդվածի 2-րդ մասի 5-րդ եւ 6-րդ կետերով նախատեսված հանցագործության կատարման մեջ եւ նրա նկատմամբ նշանակել պատիժ` ազատազրկում 3 տարի ժամկետով` առանց գույքի բռնագրավման: