Քիչ առաջ  30-ին մոտ մի տղամարդ, դանակը ձեռքին,  ԱԺ ընդունարանից ներս է մտել և, հաշվի չառնելով անվտանգության աշխատակիցներին, կարողացել է ներխուժել ԱԺ բակ:

«Անկախ»-ի թղթակիցը ԱԺ-ից տեղեկացնում է, որ  ԱԺ անվտանգության աշխատակիցները փորձել են բռնել տղամարդուն, բայց վերջինս կարողացել է շրջանցել նրանց ու  հայտնվել է ԱԺ բակում:

Անվտանգության ծառայողները լրացուցիչ օգնություն են խնդրել շենքի ներսից, որտեղից դուրս եկած անվտանգության աշխատակիցների խումբը   տղամարդուն հրահանգել է  կանգ առնել, սակայն վերջինս շարունակել է դանակը ձեռքին  վազել դեպի  շենքի մուտքը:

Մի քանի նախազգուշական հրահանգներից հետո անվտանգության աշխատակիցները օդ են կրակել, սակայն դա նույնպես չի կանգնեցրել նրան:

Ստիպված տղամարդուն վնասազերծել են` ոտքին կրակելով: Վիրավորին 1-ին բուժօգնություն է ցույց տվել ԱԺ բուժաշխատակիցը, որից հետո շտապօգնության   մեքենայով տղամարդուն տեղափոխել են հիվանդանոց:

Հարցին թե ով ես,  նա պատասախնել է` ես Քրիստոսն եմ:

ԱԺ-ից «Անկախ»-ի թղթակիցը տեղեկացնում է, որ այս պահին դրությունը ԱԺ-ում լարված է, տեղում  են  ԱԱԾ պետական պահպանության ծառայության մի խումբ աշխատակիցներ:

Դանակն առգրավված է, կատարվում են քննչական աշխատանքներ:

Այս պահին, սակայն, լրագրողներին չեն թողնում մոտենալ պատահարի վայրին: