Ռուսաստանի Դաշնության Կենտրոնական բանկը Լոնդոնի Օլիմպիական խաղերում Ռուսաստանը ներկայացնող չեմպիոնների ու մրցանակակիրների անուններով մետաղադրամներ կթողարկի: Այս մասին, REGNUM-ի փոխանցմամբ, հայտնել է նախագահ Վլադիմիր Պուտինը:

«Մենք զրույց ենք ունեցել Կենտրոնական բանկի նախագահ Սերգեյ Իգնատևի հետ: Ըստ պայմանավորվածության` Օլիմպիական խաղերի արդյունքներով կթողարկվեն չեմպիոնների ու մրցանակակիրների անուններով 1 ռուբլի անվանական արժեքով մետաղադրամներ»,- ասել է Պուտինը:

Նախագահի խոսքով` հաղթողների անունները կհայտնվեն ոսկե մետաղադրամների, արծաթե ու բրոնզե մրցանակակիրների անունները` համապատասխանաբար արծաթե ու բրոնզե մետաղադրամների վրա:

Ռուսաստանը խաղերի մեկնարկից ի վեր նվաճել է 3 ոսկե, 12 արծաթե ու 8 բրոնզե մեդալ: Առաջին ոսկե մեդալը Ռուսաստանի հավաքականին է պարգևել հայազգի ձյուդոյիստ Արսեն Գալստյանը: Հուլիսի 28-ին 60 կգ քաշային կարգի տղամարդկանց ձյուդոյի մրցաշարի եզրափակչում 23-ամյա մարզիկը հաղթել էր ճապոնացի Հիրոակի Հիրաոկային։