Դեմքի չոր մաշկը բավականին հաճախ է հանդիպում։ Այն շատ զգայուն է շրջակա միջավայրի անբապենպաստ գործոնների ու ոչ ճիշտ խնամքի նկատմամբ, ինչը ժամանակից շուտ կնճիռների պատճառ է դառնում։ Հենց այդ պատճառով էլ չոր մաշկը ճիշտ ու ամենօրյա խնամքի ավելի շատ կարիք ունի։ Դիմահարդար Էլմիրա Նալբանդյանն առաջարկում է դեմքի չոր մաշկի դիմակների 5 բաղադրատոմս.

«Նախեւառաջ, պետք է սկսել պիլինգից՝ մաշկի մակերեւույթից մեռած բջիջները հեռացնելու համար, ինչը սովորաբար մաշկին չոր տեսք է տալիս։ Ապա պետք է մաշկը խոնավեցնել, ինչն արվում է տաք ջրով սփրեյի միջոցով, որի բաղադրությունը շատ մոտ է մաշկի մեջ եղած խոնավության բաղադրությանը։ Իսկ արդեն դրանից հետո կարելի է մաշկին հետեւյալ դիմակները դնել.

Կաթնաշոռից ու բանանից սնուցող դիմակ

Լավ տրորեք հասած բանանի միջուկը, դրանից մեկ ճաշի գդալը տրորեք նույնքան կաթնաշոռի եւ երկու ճաշի գդալ կաթի հետ։ Քսեք դեմքին եւ 15-20 րոպե պահելուց հետո լվացեք տաք ջրով։ Այս դիմակի մեջ կաթը կարելի է փոխարինել մեկ ճաշի գդալ թթվասերով կամ կաթի սերով, կամ էլ դրա փոխարեն ձվի մեկ դեղնուց օգտագործել։ Իսկ բանանի փոխարեն կարելի է խուրմայի միջուկ վերցնել։ 

Տնային դիմակ-քսուք ձիթապտղի յուղով, կաթնաշոռով ու ձվի դեղնուցով

Լավ հարեք մի ճաշգի գդալ յուղոտ կաթնաշոռը մեկ ճաշի գդալ ձիթապտղի յուղի ու ձվի դեղնուցի հետ։ Դիմակը քսեք դեմքին ու մի քանի րոպեից լվացեք։ Այս ժողովրդական դիմակը արդյունավետ կերպով խոնավեցնում ու փափկացնում է չոր մաշկը։ 

Թթվասերա-խնձորային սնուցող դիմակ չոր մաշկի համար

Կեղեւազրկեք խնձորն ու անցկացրեք քերիչով։ Խնձորի պյուրեի մեջ ավելացրեք մեկ ճաշի գդալ թթվասեր, դիմակը դեմքին քսեք ու 15 րոպեից լվացեք տաք ջրով։ 

Կիվիից ու մեղրից դիմակ դեմքի չոր մաշկի համար

Մեկ կիվիի միջուկը պյուրե դարձրեք։ Ավելացրեք մեկ թեյի գդալ մեղր։ Խառնելով ու մատների ծայրերի մերսող շարժումներով քսեք դեմքին հինգ րոպեի ընթացքում։ Դրանից հետո զանգվածը դեմքից մաքրեք բամբակի տաք խոնավ կտորով։ 

Սնուցող դիմակ վարսակի փաթիլներով, մեղրով ու ձիթապտղի յուղով

Խառնեք մեկ գդալ ձիթապտղի յուղն ալյուր դարձրած մեկ գդալ վարսակի փաթիլների հետ ու ավելացրեք մեկ գդալ մեղր։Ստացված խառնուրդը թողեք հանգստանա եւ երբ վարսակի ալյուրը ուռչի, քսեք այն դեմքին ու պահեք 15 րոպե։ Հետո լվացեք դիմակն ու դեմքին քսուք քսեք։