Կարմրում ես միայն այն մտքից, որ պետք է բոլոր աշխատակիցներիդ առաջ ներկայացնես քո նոր նախագիծը: Անծանոթ մարդկանց միջավայրում ակամայից ձեռքերդ սառում են ու անընդհատ դողում: Անգամ փողոցում անծանոթից ճանապարհը հարցնելն է քեզ համար դժվար: Ծանոթ իրավիճակ է:

Ըստ` Աստղիկ Բաղդասարյանի

Ամաչկոտությունը կամաց-կամաց խնդիր է դառնում քեզ համար ու սահմանափակում քո հնարավորությունները: Բայց մի՛ թող, որ դա խանգարի քեզ` վայելել կյանքդ: Տարբեր տհաճ իրավիճակներում գտիր ճիշտ հակահարվածը և մեկընդմիշտ հաղթահարիր ամաչկոտությունդ: 
Դու միակը չես

1. Ամաչկոտների ամենամեծ խնդիրն այն է, որ նրանք չափազանց շատ են մտածում այն մասին, թե ինչ են մտածում իրենց մասին ուրիշները: Եվ միայն այս մտքից ամեն ինչ թարս է ստացվում: Ընկերական ընթրիքի ժամանակ մեկ պատառաքաղն ես գցում, մեկ էլ` բաժակը կոտրում: Եվ թվում է, թե բոլորը միայն քեզ են նայում և միայն քեզ քննարկում:

Ի՞նչ անել: Այս իրավիճակը շտկելու պարզագույն տարբերակ կա: Մտածիր, որ դու միակը չես և դու դեռ լավ ես պրծել: Պարզապես հիշիր բոլոր այն հոլիվուդյան աստղերին, ում պապարացիները հանգիստ չեն տալիս: Խեղճերը նույնիսկ հանգիստ խանութ չեն կարող գնալ: Ասենք, դե', օրինակ` Բրիթնի Սպիրսը: Պատկերացրու, թե ոնց են քրքրում նրան` վերջին սանրվածքի կամ պահվածքի համար... Խեղճ Բրիթնի:

Շռայլ ժպիտներ

2. Անծանոթ մարդկանց միջավայրում լռակյացներից ամենալուռն ես, իսկ նոր ծանոթություններ հաստատելիս սեփական անունդ մոռանալու չափ հուզվում և ամաչում ես: Տղաների հետ խնդիրն ավելի է լրջանում: Սրճարանում դիմացի սեղանի երիտասարդն արդեն տասը րոպե քեզ է նայում, իսկ դու ամոթից նույնիսկ աչքերդ չես բարձրացնում:

Ի՞նչ անել: Փողոցում քայլելիս ժպտա անցորդներին կամ մոտեցիր ու ինչ-որ բան հարցրու. ասենք ժամը կամ այսինչ փողոցը հասնելու ամենակարճ ճանապարհը: Եվ այսպիսի րոպեական ծանոթությունները քեզ համար այնքան սովորական կդառնան, որ շուտով օտար միջավայրում ծանոթություներ հաստատելն այնքան էլ դժվար չի լինի: Այս փորձի համար կարող ես ընտրել երիտասարդ և բարետես անծանոթների: Արդյունքում կստացվի երկուսը մեկում. և' ամաչկոտությունդ կհաղթահարես, և' թեթև ֆլիրտ:

Միշտ առաջինը

3. Գործնական քննարկման ժամանակ ցանկանում էիր մի լավ գաղափար առաջարկել, բայց այդպես էլ չհամարձակվեցիր: Իսկ գործընկերդ շատ արագ իր տարբերակն առաջարկեց, և բոլորը սկսեցին հիանալ նրա մտահաղացմամբ: Ա~խ, ինչ լավ կլիներ, եթե դու լինեիր առաջինը:

Ի՞նչ անել: Ամեն անգամ, երբ ինչ որ բան ես ուզում ասել կամ անել, բայց ոչ մի կերպ չես կարողանում հաղթահարել ամաչկոտությունդ, պարզապես մտածիր արդյունքի մասին: Ասենք, թե որքան լավ կլինի, եթե քո գաղափարը իրականանար: Մտածիր միայն վերջնական արդյունքի մասին: Եվ ո՞վ գիտի`տնօրենդ կսկսի ավելի լայն բացված աչքերով քեզ նայել, ու, գուցե պաշտոնդ բարձրացնի:

Անհարմար իրավիճակ

4. Գործընկերոջդ պատմում էիր, թե ինչպես երեկ սուպերմարկետում հանդիպեցիր տնօրենիդ, և որքան ծիծաղելի տեսք ուներ նա իր այդ մեծ,կարմիր ակնոցով: Այդ ամենը շատ ծիծաղելի էր, բայց երբ շրջվեցիր, պարզվեց, որ տնօրենդ այնքան էլ ուրախ չէր դա լսել: Ա~յ, քեզ անհարմար իրավիճակ ....

Ի՞նչ անել: Ամոթից կարմրելու, հեռացման դիմումը ինքնակամ նրա սեղանին դնելու կարիք դեռ չկա: Խորը շնչիր, թող թթվածինը հասնի մկաններիդ նյարդերիդ և հանգստացնի կարմիր թշիկներդ: Թեթև ժպտա և ներողություն խնդրիր: Սա միանգամից կհարթի իրավիճակը, և էլ կարիք չի լինի երկար բացատրություններ հորինելու:

Ծիծաղում է նա, ով...

5. Անհարմար և ծիծաղելի իրավիճակներ բոլորի հետ էլ պատահում են: Եվ եթե ակումբում պարելիս գլուխդ պտտվեց ու պարահրապարակից ուղիղ չվերթով վայրէջք կատարեցիր իր համար հանգիստ կոկտել խմող երիտասարդի վրա, ապա ամոթից կարմրել- կապտել պետք չէ:

Ի՞նչ անել: Պարզապես ծիծաղիր ինքդ քեզ վրա, և ամեն ինչ այդպես թեթև էլ կանցնի: Թող բոլորը տեսնեն, թե ինչպես ես վայելում կյանքդ իր բոլոր անակնկալներով: Այն, որ կարող ես սեփական անհաջողությունների երեսին ժպտալ, քեզ շատ ավելի գրավիչ է դարձնում: