ԱՄՆ Փենսիլվանիա նահանգում երկու 15-ամյա դեռահասներ մանկապիղծի ձեռքից փրկել են 5-ամյա աղջնակին՝ հասնելով չարագործի ավտոմեքենային հեծանիվներով: Այս մասին հաղորդում է CNN հեռուստաալիքը:
Ջոսելին Ռոհասի ծնողներն անհանգստացել են, երբ երեխան անհետացել է Լանքասթեր քաղաքում գտնվող իրենց տան բակից: Ոստիկանությունը ենթադրել է, որ հանցագործը կարող էր խաբելով աղջնակին ավտոմեքենա նստեցնել՝ պաղպաղակ առաջարկելով: Իրավապահները տեղի բնակիչներին խնդրել են օգնել որոնումների հարցում:
Թեմար Բոգսը և նրա ընկերը հեծանիվներով որոնումներ են իրականացրել շրջանում: Երիտասարդները Ջոսելինին նկատել են անցնող ավտոմեքենայի հետևի նստարանին և սկսել են հետապնդել ավտոմեքենային, ինչը տևել է 15 րոպե: Չարագործը նկատել է դեռհասներին և բաց թողել աղջնակին, որից հետո անհետացել է:
«Ես զգում եմ, որ այսօր շատ կարևոր բան եմ արել»,- իր արարքը համեստորեն մեկնաբանում է Բոգսը:
Դժբախտաբար, հանցագործը դեռևս ազատության մեջ է: Ներկայումս ոստիկանությունը որոնում է 50-70 տարեկան տղամարդուն:
|
