NEWS.am-ին նոր մանրամասներ են հայտնի դարձել հուլիսի 20-ին Մեղրիում 34-ամյա Միխայել Վ.-ի` կնոջը` 29-ամյա Նելի Ա.-ին սպանելու դեպքի առթիվ:

Մեր տեղեկություններով` Միխայել Վ-ն եւ Նելի Ա-ն ամուսնացել են 11-12 տարի առաջ, նրանք ունեն 4 երեխա` 3 որդի եւ մեկ դուստր, կրտսերը 3 տարեկան է, ավագը` 10 տարեկան: Ամուսնությունից հետո որոշ ժամանակ նրանք ապրել են Թղկուտ գյուղում, այնուհետեւ տեղափոխվել Ագարակ:

Միխայել Վ-ն Թղկուտ  գյուղից է, ունի երկու քույր եւ մեկ եղբայր, ով ապրում է Ռուսաստանում, նրա հայրը մահացած է, ապրում է մոր հետ: Նրա կինը` Նելի Ա-ն, Ագարակից է: Վարդանիձորի գյուղապետ Ալբերտ Բեգլարյանը մեզ հետ զրույցում ասաց, որ Միխայելը նորմալ, աշխատող, տղա է, լավ մեխանիկ, սկզբից աշխատել է ոսկու հանքավայրում, այնուհետեւ Ագարակի կոմբինատում, որոշ ժամանակ էլ մեկնել էր Մոսկվա` արտագնա աշխատանքի: «Նրանք ամուսնացած են եղել, բայց վեճեր են ունեցել, մոտ մեկ տարի է` առանձին էին ապրում, տղան գնացել էր Ռուսաստան` մի քանի ամիս աշխատանքի, նորից վերադարձել եւ մոտ մեկ ամիս առաջ է մտել աշխատանքի Ագարակի կոմբինատում»,- ասաց գյուղապետը` հավելելով, որ հստակ չգիտի, թե ինչ թեմայով էին վիճաբանություններ ունենում, ինչ խնդիրներ կային ընտանիքում:

Գյուղապետը նաեւ պատմեց, որ շրջանառվող տեղեկությունների համաձայն` ամուսինը գնացել էր Ագարակ, այն շենքի մուտքում, որտեղ ապրել է կինը, սպասել է վերջինիս վերադարձին եւ հենց մուտքում նրան դանակահարելով սպանել: Կինը օգնություն է կանչել, հարեւանները դուրս են եկել, սակայն չեն հասցրել օգնել նրան, արդեն ուշ էր:

Մեր տեղեկություններով` 34-ամյա տղամարդուն կկալանավորեն:

Ավելի վաղ NEWS.am-ը հայտնել էր, որ Մեղրիում ողբերգական դեպք է գրանցվել. ոստիկանության տեղեկություններով՝ 34-ամյա Միխայել Վ.-ն սպանել է կնոջը` 29-ամյա Նելի Ա.-ին:

Ոստիկանության մամուլի ծառայությունից հայտնում են, որ այսօր՝ հուլիսի 20-ին, ժամը 01.10-ին, հիվանդանոցից  ոստիկանության Մեղրիի բաժնում հաղորդում է ստացվել, որ դանակի բազմաթիվ հարվածներից մահացած` իրենց մոտ է տեղափոխվել Ագարակ քաղաքի բնակչուհի, 29-ամյա Նելլի  Ա.-ն:

Մեկնած օպերատիվ խումբը պարզել է, որ նույն օրը, ժամը 01.00-ի սահմաններում, Ագարակ քաղաքի Չարենցի փողոցի թիվ 1 շենքի շքամուտքում, անձնական հարցերի շուրջ ծագած վիճաբանության ժամանակ,  Նելլի Ա-ն մարմնի տարբեր մասերին դանակով բազմաթիվ հարվածներ հասցրել եւ նրան  սպանել է ամուսինը` 34-ամյա Միխայել Վ.-ն:

Նույն օրը, ժամը  01.30-ին,  Միխայել Վ.-ն  ներկայացել է ոստիկանություն եւ հայտնել, որ ընտանեկան հարցերի շուրջ առաջացած վեճի արդյունքում սպանել է կնոջը: Նշանակվել է դատաբժշկական փորձաքննություն: Փաստի առթիվ ՀՀ քրեական օրենսգրքի 104 հոդվածի 1-ին մասի հատկանիշներով հարուցվել է քրեական գործ: Միխայել Վ.-ն ձերբակալված է: Կատարվում է նախաքննություն: