Աստղիկի կյանքը թվում էր թե անցնում է բնականոն հունով։ Աստղիկը ամուսնացել էր սիրելով, ամուսինը բավականին ուշադիր էր, ունեն 3 տարեկան որդի, Աստղիկն աշխատում էր իր մասնագիտությամբ։ Սակայն եկավ մի շրջան, երբ Աստղիկի ամուսինը՝ Կարենը, սկսեց ցանկացած, թեկուզ փոքր վեճի ժամանակ կռվել Աստղիկի հետ, ու ձեռք բարձրացնել նրա վրա։ Սկզբում ընդամենը հրմշտում էր, հետո արդեն խփում Աստղիկի գլխին։ Այդ ամենը տեղի էր ունենում փոքրիկի ներկայությամբ։

Աստղիկը երբեմն աշխատանքի էր գնում կապտուկներով, հետո այդ իրավիճակն այնքան խորացավ, որ նյարդային վիճակից Աստղիկի ողջ դեմքը ծամածռվել էր։ Ու թեև բնավորությամբ բավականին ավանդապաշտ էր, ու մինչ այս պատմությունը, կարծում էր, որ պետք է ամեն պարագայում ներել ամուսնուն՝ հանուն երեխայի հանգստության՝ ուստի այդ ծեծուջարդից հետո փոխվեց Աստղիկի մտածելակերպը։ Թեև նախկինում շատ էր սիրում ամուսնուն, բայց սերն էլ գնալով պակասել էր, ու փոփոխվել մեկ այլ զգացմունքի, որն անուն չուներ։ Աստղիկը հեռացավ Կարենից, երեխայի հետ տեղափոխվեց վարձով ապրելու՝ թույլ չտալով ամուսնուն իրեն նվաստացնել։