Ամուսնուց հեռացած երիտասարդ կինը նրա սպառնալիքները չլսելու համար ինքնասպանության փորձ է արել: Նա խոհանոցային դանակով փորձել է ինքնասպան լինել, սակայն մայրը նկատելով հետ է պահել այդ քայլից:

Այս մասին NEWS.am-ը տեղեկացավ  Ապարանի ընդհանուր իրավասության դատարանից: 

Գործի նյութերի համաձայն՝ 29-ամյա Սամվել Ե.-ն 2008թ.-ին փաստական ամուսնական հարաբերությունների մեջ է գտնվել Աշտարակ քաղաքի բնակիչ Հայարփի Ս.-ի հետ, սակայն ալկոհոլային խմիչքը չարաշահելու եւ աշխատանք չունենալու պատճառով 2012 թ.-ից նրա եւ Հայարփի Ս-ի անձնական հարաբերությունները սրվել են, որի պատճառով վերջինս իր մանկահասակ երկու երեխաների հետ ամուսնու հայրական տնից հեռացել եւ սկսել է բնակվել իր հայրական տանը:

Սամվել Ե.-ն բազմիցս հանդիպել եւ պահանջել է համատեղ ապրել: Մերժում ստանալուց հետո նրան տվել է սպանության եւ նմանատիպ բնույթի ռեալ եւ իրական սպառնալիքներ, խոստացել, որ չի թողնի հանգիստ ապրել, որի պատճառով Սամվել Ե.-ի կողմից արված հերթական սպառնալիքների պատճառով կինը 2013թ. ապրիլի 30-ին, ժամը 15:00-ի սահմաններում, փորձել է խոհանոցային դանակով վնասել իրեն` ինքնասպան լինել, սակայն նրա մայրը նույն պահին կանխել է:

Քրեական գործ  է հարուցվել 110 հոդվածի 1-ին մասով`  սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը: Սույն հոդվածը պատժվում է ազատազրկմամբ` առավելագույնը 3 տարի ժամկետով: Խափանման միջոց ընտրվել է բնակավայրից չհեռանալու մասին ստորագրությունը: Սեպտեմբերի 4-ին որոշումը ուղարկվել է կողմերին, առաջիկայում կնշանակվի դատական քննության օրը: