Ամերիկացի ատամնաբույժը 21-ամյա աուտիստ Քրիստոֆեր Քրայսթին, ով գնացել էր սովորական հետազոտման, առանց ատամների է թողել: Բժիշկն, ով աշխատում է Ինդիանապոլիսի ստոմատոլոգիական կլինիկաներից մեկում, հեռացրել է 21-ամյա այցելուի բոլոր ատամները:
Ինչպես պարզվել է, պատահածից մի քանի օր առաջ Քրիստոֆեր Քրայսթ անունով երիտասարդն, ով մանուկ հասակից տառապել է աուտիզմով, դիմել է բժշկին իր խնդրով' նա ուժեղ ատամնացավ է ունեցել: «Բժիշկը պնդում էր, որ պետք է հեռացնի իմ ատամներից երեքը, որպեսզի այդ սարսափելի ցավերն անցնեն: Ես նույնիսկ չէի մտածում, որ ամեն ինչ այսքան տխուր վերջաբան կունենա»,-հիշում է ամերիկացին:
Մինչև ատամնաբուժական աթոռին նստելը բժիշկը երիտասարդին է տվել անհայտ ծագմամբ դեղահաբեր և ասել, որ դրանք կօգնեն նրան հարմարավետ զգալ: Դրանից հետո ատամնաբույժը նրան ցավազրկող է ներարկել:
«Երբ նա հեռացնում էր իմ առաջին երեք ատամները, ես չէի անհանգստանում, բացարձակ հանգիստ էի,-խոստովանել է երիտասարդը: Սակայն շուտով տանջող ցավ զգացի և տեսա, որ բժիշկը շարունակում է հեռացնել ատամներս մեկը մյուսի հետևից: Ես չէի հասկանում, թե ինչ է կատարվում, դեղերի ազդեցությամբ ոչինչ չէի կարողանում անել»: Ամերիկացու խոսքով' բժիշկը, նրան տուն է ուղարկել' չբացատրելով իր գործողությունների տրամաբանությունը, կարծես ոչինչ չի եղել:
Ելնելով իր հոգեբանության առանձնահատկությունից, Քրայստը երկար ժամանակ չի կարողացել բացատրել, թե ինչ է իր հետ կատարվել: Առանց ատամների մնացած աուտիստը խորը դեպրեսիայի մեջ է ընկել և իրականում զրկվել խոսելու կարողությունից:
«Ես դժվարությամբ եմ կարողանում արտաբերել մտքերս: Իմ կյանքն այլևս առաջվանը չի լինի»,-ասում է տուժած երիտասարդը:
Քրայսթի հարազատները փորձել են անձամբ իմանալ բժշկի չարագործության պատճառները և պատժել նրան: Սակայն ատամնաբույժը հրաժարվում է ինչ- որ մեկնաբանություններ տալուց և խուսափում է իր այցելուի հետ շփումներից: Հավաքելով ուժերը' Քրայսթի ընտանիքը պատրաստվում է դիմել դատարան: