Այսօր ավարտվեցին ռեժիսոր Արմեն Միրզոյանի «Վազիր կնոջդ մոտ» նոր հայկական գեղարվեստական ֆիլմի նկարահանումները։

Այս կատակերգության սյուժեն հիմնված է Ռեյ Կունի «Run for your wife» պիեսի վրա, որը հարմարացվել է հայկական իրականության համար։ «Իհարկե, դժվար էր անգլիացի ձիգ ոստիկանի կերպարը մոտեցնել դասական հայ տղամարդու արտաքինին, սակայն մենք շատ աշխատեցինք»,- կատակում է ռեժիսորը։

Ֆիլմի բյուջեն գնահատվում է 15-20 մլն դրամ (40-50 հազար դոլար)։ «Ամենասկզբում այս ֆիլմը մեզ համար ընդամենը կոմերցիոն նախագիծ էր, սակայն աշխատանքի ընթացքում այնքան տարվեցինք, որ դադարեցինք խնայել բյուջեն ու աշխատեցինք ամբողջ ուժով։ Ողջ թիմն աշխատում էր մեծ նվիրվածությամբ», -NEWS.am STYLE –ի թղթակցի հետ զրույցի ընթացքում պատմեց Արմեն Միրզոյանը։

NEWS.am STYLE -ն ավելի վաղ հայտնել էր, որ «Վազիր կնոջդ մոտ» ֆիլմի սյուժեն ծավալվում է մի բավականին խառը պատմության շուրջ. գլխավոր հերոսը օրինիական երկու կին ունի եւ ամեն կերպ փորձում է թաքցնել մեկի գոյութունը մյուսից։ Սակայն, ինչպես եւ պատահում է ցանկացած բարի կատակերգության մեջ, բոլոր արկածներն ավարտվում են happy end-ով։

NEWS.am STYLE