Պերմի երկրամասի Ալեքսանդրովսկ քաղաքի դատախազությունն ուսումնասիրում է շրջանառվող այն տեղեկատվությունը, որ հիվանդանոցներից մեկում, հիվանդներին իրենց համար ֆոն ծառայեցնելով, բուժքույրերը ֆոտոսեսիա են անցկացրել:

«Մեր աշխատակիցներն այդ թեմային առնչվող բոլոր նյութերը կուսումնասիրեն և կգնահատեն իրավիճակը»,- «INERFAX»-ին հայտնել է Ալեքսանդրովսկի քաղաքային դատախազության ներկայացուցիչը:

Նա նաև տեղեկացրել է, որ կպարզաբանվի նաև հիվանդանոցի աշխատակիցների գործողությունների դրդապատճառը:

Աղմուկ առաջացրած լուսանկարների մասին հայտնի է դարձել այն բանից հետո, երբ հիվանդանոցի աշխատակցուհիների պատկերաշարքը առաքվել է ԶԼՄ-ներից մեկի խմբագրություն: Դրանցում բնորդուհի դարձած բուժաշխատողները տարբեր դիրքերով ցուցադրում են թե ինչպես են «խմում» դոնորական արյուն, աճպարարություններ կատարում բժշկական տարբեր գործիքներով, իսկ լուսանկարներից շատերի երկրորդ պլանում երևում են ծանր հիվանդություններով տառապող մարդիկ:

Հաղորդագրության մեջ նշվում է, որ ՌԴ Քննչական կոմիտեի Պերմի տարածաշրջանային քննչական վարչությունում, այնուամենայնիվ, այս պատմության մեջ չեն տեսնում իրենց գերատեսչության մասով հանցագործության բաղադրիչ: