Հայկական երիտասարդ ընտանիքներում կոնֆլիկտների պատճառ ամենից հաճախ ծնողներն են դառնում: Կոնֆլիկտների պատճառների եւ դրանք հաղթահարելու մասին հուլիսի 12-ին լրագրողների հետ հանդիպման ժամանակ պատմեցին հոգեբան Իրինա Ծատուրյանը եւ սեքսոպաթոլոգ Մարատ Զաքարյանը:

Հոգեբանի խոսքով, ընտանիք հասկացությունն ինքնին փոխկապակցված է առօրյա խնդիրների հետ: Ամբողջ հարցն այն է, թե ինչպես պետք է դրանք լուծել:

«Իմ դիտարկումների համաձայն, 1980-ական թվականների վերջից հայկական ավանդական ընտանիքի հասկացությունն ու սխեման սկսել է փոխվել: Դրան նպաստել են տարածաշրջանում պատերազմները, դրանց հետեւած տնտեսական եւ սոցիալական խնդիրները: Շատ կանայք ստիպված իրենց վրա են վերցրել սոցիալական այն դերը, որը պատկանում է ընտանիքի հորը: Հաճախ հայ կինը դառնում է ընտանիքի հիմնական կերակրողը՝ միաժամանակ զբաղվելով նաեւ երեխաների դաստիարակությամբ»,- նշեց հոգեբանը:

Նրա խոսքով, երեխաների եւ պատանիների հոգեբանության նորմալ ձեւավորման եւ զարգացման համար նրանց դաստիարակությամբ պետք է զբաղվեն երկու ծնողն էլ, բայց, ցավոք, հետխորհրդային շրջանում ընտանիքի շատ հայրեր ստիպված էին լքել Հայրենիքը եւ մեկնել արտագնա աշխատանքի: Տնտեսական եւ սոցիալական լրջագույն խնդիրների պատճառով ընտանիքի ինստիտուտի կարեւորությունը մղվում է երկրորդ պլան:

Ընտանիքում հաճախակի կոնֆլիկտների պատճառ է դառնում նաեւ միջուկային ընտանիք հասկացության բացակայությունը. ընտանիք, որը կազմված է ծնողներից (ծնողից) եւ երեխաներից, կամ էլ՝ միայն ամուսիններից:

«Հաճախ երիտասարդ ընտանիքներին օգնում են նրանց ծնողները: Երբեմն այդ լինում է ֆինանսական օգնության տեսքով: Այդ պատճառով էլ ծնողները, երբեմն նույնիսկ բարեկամներն իրենց պարտքն են համարում երիտասարդների ընտանեկան խնդիրները լուծողի դերը ստանձնել: Այդ դեպքում արդեն անհնար է խուսափել որոշակի միավորումների ստեղծումից, ինչի հետեւանքով հսկայական խնդիրներ են առաջանում, որոնք երբեմն ավարտվում են ամուսնալուծությամբ»,- ամփոփեց Իրինա Ծատուրյանը:

Իր հերթին, Մարատ Զաքարյանը նշեց ընտանեկան կոնֆլիկտների առաջացման փուլերը: Նրա խոսքով, ընտանիքում կոնֆլիկտներ առաջանում են ամուսնական կյանքի առաջին երկու տարիներին, այնուհետեւ երեխաների ծննդից հետո, եւ վերջում՝ հասուն տարիքում, երբ ամուսիններն օրգանիզմի ֆիզիոլոգիական եւ հոգեբանական փոփոխություններ են ապրում:

Մասնագետների կարծիքով, ընտանեկան կոնֆլիկտները լուծելու հիմնական ճանապարհը համատեղ քննարկումն ու սոցիալական, հոգեբանական եւ սեռական խնդիրները հաղթահարելն է:

NEWS.am STYLE-ի թղթակցի հետ զրույցում ընտանեկան բռնության թեմայի վերաբերյալ հոգեբան Իրինա Ծատուրյանը պատմեց երեւույթը կանխելու միջոցների մասին. «Առաջին հերթին դրան նպաստում են երեխաների դաստիարակության հարցում ծնողների սխալները, եւ, իհարկե, ծնողների միջեւ կոնֆլիկտները, ովքեր երեխաներին չեն թաքցրել սեփական խնդիրները: Ապագա բռնակալից խուսափել կարելի է դեռեւս հանդիպելու ժամանակահատվածում: Բաց շփման արդյունքում զույգը պետք է ավելի լավ ճանաչի միմյանց: Այդ հնարավորություն կտա բավարար պատկերացում կազմել մեկը մյուսի մասին»:

Գրիգոր Ավետիսյան

NEWS.am STYLE