Կոսմետիկ գյուտերի ու խնամքի միջոցների ընտրության առատությունն աչք է շոյում ցանկացած սուպերմարկետում։ Մանկական օճառ, կանացի օճառ, տղամարդու օճառ, դեմքի օճառ, ձեռքերի, ոտքերի, մարմնի, ինտիմ հիգիենայի, բաոբաբի յուղով ու հազարան բմբուլի փետուրով… Պետք է, արդյո՞ք, իրականում այսքան «օճառային» բազմազանությունը, թե՞ այն արտադրողի հերթական «դավադրության» դրսեւորումն է մեզնից՝ կանանցից ավելի շատ փող քամելու նպատակով։ Այս հարցին NEWS.am STYLE –ի թղթակցին պատասխանեց Օճառային ստուդիայի տնօրեն, գլխավոր օճառագործ եւ վաճառող Մարիա Բաղդասարովան.

«Ձեռագործ օճառը միշտ պարունակում է յուղեր եւ բնական մթերքներ։ Եթե հավատանք պիտակներին, գործարանայինները, տեսականում, նույնպես։ Առաջին տեսակի առավելությունների մասին արդեն խոսել ենք։ Կարծում եմ, այժմ ժամանակն է դիտարկել «դեմքի օճառի» եւ «մարմնի օճառի» տարբերությունը։ 

Դեմքի մաշկը շատ ավելի նուրբ է, քան մարմնինը, այդ պատճառով էլ հատուկ խնամք է պահանջում։ Օրինակ, եթե մարմնի հակացելյուլիտային օճառի մեջ ես ավելացնում եմ կոպիտ սպունգ-լյուֆա սուրճի հատիկներով, ապա նույն մաքրող արդյունքը ստանալու համար դեմքի օճառի մեջ օգտագործում եմ վարսակի, շաքարավազի ու ծովային աղի աղացած մասնիկներ։

Ինչ վերաբերում է յուղերին, ապա համարյա բոլորն էլ հարմար են թե՛ դեմքի, եւ թե՛ մաշկի համար»։

Գրի առավ Անահիտ Գրիգորյանը/NEWS.am STYLE

NEWS.am