Մինչ «Դժվար ապրուստ» սերիալին հետևողները և ոչ միայն շարունակում են քննադատել կամ շնորհավորել Մերիի դերակատար Մերի Մակարյանին Գլենդեյլում կայացած «Armenian Golden Star 2012»-ի շրջանակում «Սերիալային լավագույն դերասանուհի» տիտղոսին արժանանալու առիթով, նա սպասում է Քիմ Քարդաշյանի հետ իր հանդիպմանը, իսկ մինչ այդ BRAVO.am-ի հետ խոսել է իր աշխատանքի, գործընկերների հետ հարաբերությունների եւ անձնական կյանքի մասին:

Ամեն ինչ ինքնաբերաբար ստացվեց. երբևէ չեմ մտածել, որ մի օր կմտնեմ հեռուստատեսություն կամ կնկարահանվեմ ֆիլմում, կսկսեմ դերասանի իմ կարիերան: Չեմ ակնկալել մրցանակ, հեռուստադիտողի ծափահարություն կամ լավ խոսքեր:

Ես մասնագիտությամբ վոկալիստ եմ, ավարտել եմ նաև ԵՊՀ բանասիրության ֆակուլտետը: Ոլորտում վաղուց էի աշխատում անդրկադրային ձայնով, ուղղակի չէի երեւում, հետո սկսեցի հաղորդում վարել, ապա «Շանթից» տեղափոխվեցի «Արմենիա» հեռուստաընկերություն` որպես «Բարի լույս»-ի հաղորդավար, իսկ որոշ ժամանակ անց առաջարկ ստացա նկարահանվել հեռուստասերիալում:

Այն, որ հեռուստադիտողն ինձ սպասում է, հաստատ է. իրենք իմ կարիքն ունեն, ես` իրենց: Դեռ չեմ որոշել, թե սերիալի ավարտից հետո ինչ կանեմ` ֆիլմում կնկարահանվեմ, հաղորդում կվարեմ, բայց ինչ-որ բան հաստատ կանեմ: Առաջարկները շատ են:

«Հաճելի է, որ խոսում են»

Այնքան բան եմ լսում իմ մասին: Վերջին «հետաքրքիր» նորությունն ընկերուհիս փոխանցեց. զանգեց ու ասաց, որ իր մայրիկի աշխատավայրում է, որտեղ ասում են, թե Մերին հղի է, ասացի` կլինի ճշտես` ումից: Նմանատիպ խոսակցություններ շատ են լինում, չգիտեմ աղբյուրը, բայց դե հաճելի է, որ խոսում են:

Ի՞նչ կապ ունեն Մերի Մակարյանն ու Միհրան Ծառուկյանը

Ես և Միհրանը մտերիմ ընկերներ ենք: Հասարակության հետաքրքրությունը, կարծում եմ, կապված է սերիալում Միհրանի կնոջ դերում հանդես գալուս հետ: Բայց ես մտերիմ եմ նաև սերիալի մյուս տղաների հետ:

Միհրանի ռուսաստանյան համերգային շրջագայության ժամանակ ես էլ եմ եղել այնտեղ, բայց` ոչ իր հետ:

«Էլենի հետ ընկերուհիներ չենք, բայց…»

Իմ և Էլենի միջև լարվածություն չկա, ուղղակի ֆիլմի սցենարն է աղմուկ բարձրացրել: Մեր հասարակությունն այնքան լուրջ է ընդունում այդ ամենը, իսկ մենք նորմալ հարաբերությունների մեջ ենք, ընկերուհիներ չենք, բայց նորմալ գործընկերներ ենք:

«Ուրախ եմ, որ խաղում եմ այս դերը»

Մերիի կերպարը շատ պատահական է «ստացվել». ինքս երբևէ չեմ մտածել, որ կարող եմ նման կերպ խաղալ այդ դերը: Ասում են` այնքան լավ եմ խաղում, որ մարդիկ ինձ իսկապես ատում են: Կանայք ու աղջիկները, ովքեր սիրում են Միհրանին, բնականաբար, ինձ պետք է ատեն:

Չեմ նեղվում, երբ քննարկում են իմ կերպարը: Շատ ուրախ եմ, որ խաղում եմ այս դերը, այն մեծ հնարավորություն, ստեղծագործական թռիչք է տալիս դերասանին: Մեծ հաճույք եմ ստացել այն կերտելիս, եղել են բավական բարդ, հոգեբանական տեսարաններ, որոնք ստացել եմ շատ կարճ ժամանակահատվածում եւ, կարծում եմ, պատվով եմ դա արել:

Շատ կանայք, օրինակ վերցնելով իմ կերպարից, փորձել են պայքարել, մեթոդներ մշակել ամուսիններին իրենց կողքին պահելու համար: Սերիալում Մերիի ասելիքը դեռ չի հասել իր տրամաբանական ավարտին: Գիտեմ շատերին, որոնք շատ բան են վերցրել իմ կերպարից եւ սպասում են նրա ասելիքին:

«Դժվար ապրուստն» ինձ մեծ ճանաչում տվեց, ընտանեկան կյանքի հետ կապված փորձ` նշանդրեք, հարսանիք, հարսի շոր, ավանդույթներ, սկեսուր-սկեսրայր: Մարդկանց ճանաչելու հնարավորություն տվեց, օգնեց շփվել այդ ասպարեզի մարդկանց հետ եւ մնալ կայուն իմ համոզմունքների մեջ:

Սերիալը կա, կլինի այնքան, ինչքան կլինի հեռուստադիտողը: Սերիալ չնայող մարդը հաճախ զարմանալիորեն ճանաչում է բոլոր կերպարներին:

Այժմ աշխատում եմ նաև որպես շոուի հաղորդավար: Կարդում եմ գովազդային տեքստեր, ուրախությամբ պետք է նշեմ, որ հիմա մետրոյում էլ իմ ձայնն է հնչում, դեռ չեմ հասցրել մետրո գնալ ու լսել:

Մերիի ևՔիմի նմանության մասին

Քարդաշյանին նմանվելու միտք երբևէ չեմ ունեցել. երբ այսքան հայտնի չէի Հայաստանում, իմ մազերը, աչքերի գույնը նույնն էին: Երբեմն նայում եմ, թե ինչպես է նա հագնվում, բայց երբեք չեմ կրկնօրինակել:Բոլորս էլ գիտենք, որ նա գեղեցիկ ու ճաշակով աղջիկ է: Սպասում եմ մեր հանդիպմանը. ունենք ընդհանուր ընկեր, որն էլ առաջարկել է կազմակերպել այն: Կարծում եմ` հետաքրքիր կլինի:

Մերի Մակարյանի սիրտը զբաղված է

Այո, իմ սիրտը զբաղված է: Տղամարդու իմ իդեալը` տղամարդն է:

Երբևէ ամուսնացված կամ նշանված չեմ եղել, բժշկական ոչ մի տեսակի միջամտությունների չեմ դիմել, հղի չեմ եղել:

Իմ կյանքում ոչինչ չեմ պլանավորում: Ամեն ինչ դեռ առջևում է:

Զրուցեց Սիրանուշ Եղիազարյանը
Լուսանկարները` Էմին Արիստակեսյանի
bravo.am