Կոտայքի մարզի ընդհանուր իրավասության դատարանի Եղվարդի նստավայրում Մեսրոպ Մակյանի նախագահությամբ ընթանում է Հակոբ Մնացականյանի գործի դատավարությունը:

Ըստ մեղադրանքի՝ նախկինում դատված, դատվածությունը մարված 32-ամյա Հակոբ Մնացականյանը նախնական համաձայնության է եկել Դ. Ենգիբարյանի հետ՝ Եղվարդ քաղաքի բնակիչ Ա. Գ.-ի գույքն ավազակությամբ հափշտակելու վերաբերյալ: 

Հանցընկերները շուրջ մեկ շաբաթ հետևել և ուսումնասիրել են Ա. Գ.-ի ու նրա ընտանիքի անդամների տեղաշարժը: Ապա իրենց հանցավոր մտադրությունն իրականացնելու նպատակով նրանք նախապես ձեռք են բերել«ՏՏ» տեսակի ատրճանակներ և դիմակներ:

2012 թվականի ապրիլի 6-ին, առավոտյան ժամը 6-ին Հակոբ Մնացականյանն ու իր հանցընկերը պարսպի վրայով ապօրինի մուտք են գործել Ա. Գ.-ի առանձնատան բակ, բակի վերջնամասում գտնվող ցախատուն են մտել, դիմակավորված և ատրճանակներով զինված՝ դարանակալել են ու նախապատրաստվել ավազակային հարձակումն իրականացնելուն: 

Ըստ մշակված ծրագրի՝ հարձակումը պետք է գործեին տան կանանց նկատմամբ: Դրա համար դարանակալ սպասել են, թե տանտերն ու որդին երբ են տնից գնալու, որ իրենք հարձակում գործեն տանտիրուհու և դստեր նկատմամբ: 

Սակայն անսպասելիորեն, ժամը 8-ն անց 30-ի սահմաններում տանտերը՝ Ա.Գ.-ն մտել է ցախատուն: Անակնկալի եկած Հակոբ Մնացականյանն ու իր հանցընկերը, ըստ մեղադրանքի, իրենց մոտ եղած զենքերի՝ ատրճանակների բռնակներով դիտավորյալ հարվածներ են հասցրել տանտիրոջ գլխին՝ նրա առողջությանը պատճառելով կյանքին վտանգ սպառնացող ծանր վնաս, որից հետո դիմել են փախուստի՝ անկախ իրենց կամքից չկարողանալով ավարտել ծրագրված ավազակային հարձակումը: 

Հակոբ Մնացականյանին մեղադրանք է առաջադրվել ՀՀ քրեական օրենսգրքի 35-175 հոդվածի 2-րդ մասի 1-ին, 3-րդ, 4-րդ կետերով, 112 հոդվածի 2-րդ մասի 6-րդ կետով: