Դիտարկմանը, թե վարկածներից մեկի համաձայն, սպանությունը տեղի է ունեցել խանդի հողի վրա, փաստաբանը պատասխանեց. « Դա այդպես չէ: Իրականում տուժողի հետ անձնական անհաշտությունների, վիճաբանությունների խնդիր է եղել: Նրանց մեջ առաջացած վեճը տղայական դրդապատճառներ է ունեցել: Անհարգալից վերաբերմունք մեկը մյուսի նկատմամբ` տուժողը նրա նկատմամբ: Ոչ էլ պարտք ու պահանջի ինչ-որ հարց է եղել»: 

Հարցին, թե վերջին տարիներում ԱՄՆ-ում իր գործունեությունը ծավալող Կարեն Հակոբյանը  ինչո՞ւ էր վերադարձել Հայաստան ասաց.«Դե, երկար ժամանակ բացակայել էր իր ընտանիքից: Ինչպես նաեւ իր գործերի հետ կապված: Եկել էր որոշակի ժամանակ այստեղ բնակվելու` իր հայրենիքում, իր Աշտարակում երեխաների ,հարազատների մոտ: Կարոտել էր, ոչ թե հատուկ ԱՄՆ-ից եկել էր, որ այդ հարցերը պարզեր ու գնար»: Երգիչը նաեւ տեսահոլովակ նկարելու նպատակ է ունեցել:

Հարցին, թե ընդունել է իրեն մեղսագրվող արարքը, փաստաբանը արձագանքեց. «Դեռ ինքն էլ է շոկային վիճակում: Ինչ վերաբերում է մեղքը ընդունելուն, ապա կրակելու առումով ընդունել է, իսկ դիտավորության` ոչ, քանի որ տուժողին սպանելու դիտավորություն չի ունեցել: Նա մարդասպան չի, որ գնա մարդ սպանելու: Կատարվածը ակնթարթի տակ է տեղի ունեցել»: Փաստաբանից նաեւ տեղեկացանք, որ երգիչը ունի 2 մանկահասակ երեխա, ամուսնալուծված չէ: «Նորմալ հայկական ընտանիք է»,- ավելացրեց Մկրտիչ Վասակյանը:

Ավելի վաղ տեղեկացրել էինք, որ 37-ամյա Արամ Հովակիմյանի սպանությունը տեղի էր ունեցել մայիսի 8-ին, ժամը 20.30-ի սահմաններում: Սպանության մեջ մեղադրվող երգիչ Ռուբեն Հակոբյանը, ով երգարվեստում հայտնի է Կարեն Հակոբյան անուն ազգանունով, վարկածներից մեկի համաձայն` սպանությունը կատարել է խանդի հողի վրա: Ավելին ` կրակել է սպանվածի, ոչ թե ոտքին, այլ` սեռական օրգաններին: NEWS.am-ն այս տեղեկությունը փորձել էր ճշտել նաեւ ՀՀ ոստիկանության լրատվական ծառայությունից, սակայն մեզ  ընդամենը փոխանցել էին, որ նախաքննություն է ընթանում: Արագածոտնի մարզի ընդհանուր իրավասության դատարանի մայիսի 11-ի որոշմամբ 2 ամսով  Կարեն Հակոբյանը կալանավորվել էր եւ տեղափոխվել  «Նուբարաշեն» քրեակատարողական հիմնարկ: Նշենք, որ Կարեն Հակոբյանը վերջին տարիներին բնակվում էր ԱՄՆ-ում եւ նոր էր վերադարձել Հայաստան: Նա սպանվածի հետ ազգակցական կապեր է ունեցել: Վերջինս դեռեւս անհայտ պատճառներով զանգել եւ սպառնացել է Կարեն Հակոբյանին, անպատվել, ինչն էլ նրան դրդել է սպանության: