Դեռեւս Հին Հունաստանում կանայք օգտագործում էին շրթներկ: Անտիկ աշխարհի կանայք այն պահպանում էին փոքրիկ ոսկյա արկղիկներում, փորագրված զարդանախշերով, քսում էին մատով, կամ հատուկ փայտիկով: Բայց համաշխարհային ճանաչում այն ստացավ 1910թ.-ին, երբ Guerlain ֆիրման հայտնագործեց հենց այն հատուկ տարաներով շրթներկը, որը մենք կիրառում ենք այսօր: Կոսմոտոլոգները վստահեցնում են մեզ, որ այն զարդարում ու վիտամիններով սնուցում է շուրթերը, իսկ բժիշկները՝ փրփրած ապացուցում են, որ արտադրողները խնայում են նյութերը եւ շրթներկից հնարավոր է նույնիսկ թունավորվել:

Այն մասին, թե ի՞նչ անել, որ շրթունքները հմայիչ լինեն, իսկ առողջությունը չտուժի, մեզ պատմեց «Սալոն 27»-ի դիմահարդար Հերմինե Գրիգորյանը.
«Շրթներկ ընտրելիս, արաջին հերթին, պետք է նայել ապրանքանիշին: Ավելի լավ է ունենալ 2 լավ, քան 5 վատ շրթներկ: Առաջին հերթին էժանագին շրթներկը պատրաստվում է վտանգավոր նյութերից, երկրորդ` այն շուտ մաքրվում ու հոսում է: Հիշեք, ժլատը կրկնակի է վճարում: Իսկ մեր պարագայում եռակի`երկու շրթներկի ու մաշկաբանին դիմելու համար: Եվ այսպես, մոտենում ենք հայտնի շրթներկերի վաճառասեղանին: Կարծր շրթներկը պետք է լինի փափուկ (կներեք բառախաղի համար), ոչ յուղոտ, չձգող ու կայուն: Շրթներկի որակը կարելի է ստուգել` քսելով այն ձեռքի ափին` բութ մատի մոտ: Թանձր շրթներկը պետք է լինի մածուցիկ: Բանն այն է, որ եթե այն զուրկ է կպչողականությունից, ապա կհոսի շրթունքներից: Եվ այստեղ ոչ շքեղ զգեստը, ոչ խնամված սանրվածքը չեն փրկի ձեր արտաքինը: Իսկ եթե ցանկանում եք ավելի ընդգծել ծավալը, վերցրեք շրթունքների մենթոլե փայլը: Հարյուր տոկոս աշխատում է:

Եվ վերջինը: Շրթներկ ընտրելիս հիշեք, որ այն պետք է զարդարի ձեզ, այլ ոչ թե այլանդակի: Թուխ աղջիկներին սազում են քնքուշ, բաց երանգները: Սպիտակամաշկներին` կարմիրի բոլոր երանգները: Իհարկե, բացառություններ լինում են, բայց դրանք հազվադեպ են: Գունատ շրթներկ օգտագործող աղջիկը 99 տոկոս դեպքում նման է գերեզմանից հանած թարմ դիակի, իսկ ալ կարմիր շուրթերով թուխ գեղեցկուհին կորցնում է իր «արժեքը»:

NEWS.am STYLE