Վերջերս շատ վիճելի ու շատ զվարճալի թեմա մտքներովս անցավ: Քննարկում էինք` արդյո՞ք տղաների ամենասիրելի ուտեստներն են բաստուրմայով ձվածեղն ու շաուրման: Վերջը հարցում անցկացրեցինք, ու... արի ու տես, որ անակնկալներ էլ եղան :)

Պատրաստեց Գայանե Գալստյանը

Այսպես, հիմա տեսնենք, թե ինչ են նախընտրում ուտել հայ տղաները և, որոնք են նրանց շրջանում ամենատարածված ուտեստները.

1-ին հորիզոնական. տպակած կարտոֆիլ

«Ես խոհանոցից ահավոր հեռու եմ, բայց հանուն տապակած կարտոֆիլի սովորել եմ այն պատրաստել իմ սիրած ձևով` մի քիչ կարմրած, մի քիչ էլ կիսաեփ»։

Զավեն, 21 տ.

2-րդ հորիզոնական. պելմենի, խինկալի, մանթի

«Հատկապես շատ եմ սիրում ռուսական ձևով պատրաստված մանթին` աղացած մսի փոխարեն կտրտած մսով»։

Կարեն, 26 տ.

3-րդ հորիզոնական. խորոված

«12 տարեկան էի, երբ նշիկներս վիրահատեցին. դրանից հետո 10 օր շարունակ հաց չէի ուտում, կոկորդս շատ էր ցավում... 11-րդ օրը հրավիրվել էինք ընտանիքով ն հյուր, որտեղ սեղանին խորոված կար ... Այնպիսի արագությամբ սկսեցի ուտել, որ չէի էլ զգում կոկորդիս ցավը...»:

Դավիթ, 22 տ.

4-րդ հորիզոնական . մսով սպագետտի

«Մի անգամ ես ու ընկերս որոշեցինք ինքնուրույն պատրաստել մսով սպագետտի, որ մեր ընկերուհիներին զարմացնենք, բայց արդյունքում մնացինք պիցցա պատվիրելու հույսին, որովհետև միսը նախ վառեցինք, հետո էլ սպագետտին այնքան էլ եփել, որ սկսեց ցրիվ գալ»:

Միսակ, 25 տ.

5-րդ հորիզոնական. խաշ

«Մի անգամ ընկերներիս հետ գնացել էի խաշ ուտելու, կեսօրից հետո գնացի տուն ու պառկեցի քնելու, ու երբ արթնացա, ինձ թվաց` երեկո է, դու մի ասա, հաջորդ առավոտն է արդեն բացվել»:

Արման, 27 տ.

6-րդ հորիզոնական. հավի կրծքամիս կիտրոնի սոուսով

«Սիրածս աղջկա հետ գնացել էինք ռեստորան: Առաջարկեցի ինձ հետ միասին հավի կրծքամիս փորձել, համոզեցի, համոզեցի, վերջում էլ թե` «Ես քլաբ սենդվիչ կուտեմ»: Ամբողջ ռոմանտիկան փչացրեց:

Դավիթ, 20 տ.

7-րդ հորիզոնական. Սնկով կրեմ-ապուր

«Մի օր որոշել էի ինքս պատրաստել, որ ընկերուհուս վրա տպավորություն գործեի, բայց նույն օրը նրա ընկերուհու կատուն սատկեց, ու չկարողացավ գալ... իսկ ես երեք ժամ չարչարվել էի»:

Հայկ, 24 տ.

8-րդ հորիզոնական. տոլմա

«Թփով տոլման մածունով կարող եմ ուտել և´ ամառ, և´ ձմեռ. մայրս միշտ կատակում է, ասում է, այնպիսի աղջկա հետ կամուսնանաս, որ տոլմա լավ սարքել իմանա, թե չէ տանը միշտ կռիվ կլինի»:

Աբրահամ, 22 տ.

9-րդ հորիզոնական. փախլավա

«Մորաքույրս հրաշալի փախլավա է պատրաստում: Մի անգամ այնքան էի կերել, որ սիրտս խառնում էր արդեն»:

Նարեկ, 22 տ.

10-րդ հորիզոնական. Չքմերուլի

«Առաջին անգամ կերել եմ Վրաստանում, հետո Երևանի ռեստորաններում էի փնտրում, բայց բոլորովին ուրիշ բան էին մատուցում. լավ է գոնե ինտերնետում կինս գտավ իսկական բաղադրատոմսն ու ուրախացրեց ինձ»:

Սարգիս, 29 տ

cosmo.am