Եթե նախորդ տարիներին արտերկրում հանգստանալ ցանկացող հայաստանցի զբոսաշրջիկների հիմնական ուղղությունները Եգիպտոսը, Թուրքիան և այլ ավանդական հանգստավայրերն էին, ապա այս տարի նկատվում է ավելի էկզոտիկ և հեռավոր երկրներում հանգստանալու միտում. Շրի Լանկա, Հորդանան, Երուսաղեմ:

«Էդ ուղղությունները կամաց-կամաց սկսում են զարգանալ: Էդ կողմ շատ են ուզում հիմա գնալ»,- Tert.am-ի հետ զրույցում ասաց «Տուրցենտր» զբոսաշրջային ընկերության աշխատակից Մերի Ոսկանյանը:

Իսկ ահա «Տրիումֆ» զբոսաշրջային ընկերության գրասենյակը հայաստանցի զբոսաշրջիկներին այս տարի ամենաշատն ուղարկել է Իսպանիա և Իտալիա: Այս մասին Tert.am-ին հայտնեց ընկերության ներկայացուցիչ Տաթև Ղազարյանը:

«Տուրցենտրի» աշխատակիցը ևս նման միտում նկատել է և անգամ ասաց, որ Եվրոպա շատ գնում են «մեղրամիսն անցկացնելու համար»: Ամեն դեպքում, եվրոպական մայրաքաղաքներ այցելելու` հայաստանցիների ցանկությունները փոքր ինչ սահմանափակվում են մի շարք եվրոպական երկրներ, հատկապես Իսպանիա մուտքի վիզա ստանալու բարդություններով:

Մեծ պահանջարկ կա էկզոտիկ երկրներ այցելելու առումով. Բալի կղզի, Մալդիվյան և Սեյշեյլան կղզիներ, Ինդոնեզիա, Մալազիա, Սինգապուր և այլ ուղղություններ, բայց այս երկրներում ըստ զբոսաշրջային ընկերության ներկայացուցիչների խոչընդոտը փողն է, քանի որ այդ հանգստավայրերում հանգիստը «անասելի թանկ է»:

«Թռիչքներն էնպես են կազմակերպվում, որ այնտեղ հասնելու համար երեք անգամ օդանավ պետք է փոխել. Մոսկվա, հետո ՝ Սինգապուր, հետո տվյալ երկիրը: Այնպես որ միայն մեկ անձի տոմս այս էկզոտիկ երկների ուղղությամբ արժե 1000 եվրո և ավելին»,- ասաց Մերի Ոսկանյանը:

«Տրիումֆ» ընկերության ներկայացուցչի ամփոփմամբ՝ «նման տենդենց կա, ուղղակի հնարավորություն չկա»: Վերջինիս խոսքով՝ շարունակում են ակտուալ մնալ նաև հին ուղղությունը՝ Հունաստան, Թուրքիա և ամենամատչելի գոտին, ըստ զբոսաշրջային կազմակերպության աշխատակցի՝ այսօր Թուրքիան է: Թերևս այն պատճառով, որ այս տարի ավելի քիչ թվով հայ զբոսաշրջիկներ են ցանկանում հանգստանալ Թուրքիայում:

Տաթև Ղազարյանի խոսքով՝ «նստել է» նաև հայ զբոսաշրջիկների համար արդեն ավանդական դարձած Եգիպտոսը՝ արաբական հեղափոխությունից և շնաձկերի՝ հանգստացողների վրա հարձակումներից հետո:

«Օրինակ՝ կոնկրետ մենք չենք էլ ուղարկում և խորհուրդ էլ չենք տալիս, որովհետև էս պահին այնտեղ շատ շոգ է: Ձմեռն էին գնում ու եթե վտանգավոր է լինում մենք անձամբ հաճախորդներին չենք ուղարկում»,- ասաց Ղազարյանը: