Իռենն աչքի էր ընկնում իր գեղեցկությամբ ու միշտ տղաների ուշադրության կենտրոնում էր: Սովորում էր ԵՊՀ-ում, ուներ ընկերական մեծ շրջապատ։ Մինչ համալսարան ընդունվելը նա հանդիպում էր Հայկի հետ, ով իրենց դպրոցի շրջանավարտն էր և Իռենից մեծ էր երկու տարով: Հայկը ողջ սրտով նվիրված էր Իռենին ու նրա համար պատրաստ էր ամեն ինչի, սակայն համալսարան ընդունվելուն պես Իռենը խզեց հարաբերությունները նրա հետ, քանի որ սիրահարվել էր իր համակուրսեցուն:
Երկար ժամանակ Հայկը չէր համակերպվում Իռենից բաժանվելու մտքի հետ: Նա Իռենի հետ հանդիպումներ էր փնտրում, սակայն աղջիկն արդեն սկսել էր ընկերություն անել համակուրսեցու հետ, ու Հայկն էլ անզոր էր, չգիտեր ինչ անել:
Իռենն ու համակուրսեցին` Արմանը, ընկերություն արեցին երկու տարի: Նրանք ինտիմ հարաբերություններ ունեին, թեպետ այդ մասին գիտեին միայն երկուսով: Միասին շատ ծրագրեր էին կազմել, սակայն երկուսն էլ մտածում էին, որ ամուսնանալու համար շուտ է, պետք է դեռ համալսարանն ավարտեն ու լավ աշխատանք գտնեն: Նրանց բոլոր ծրագրերը խափանվեցին, երբ Իռենը պարզեց, որ երեխայի է սպասում: 
Լուրն իմանալուն պես Արմանը նրան խնդրեց ազատվել երեխայից, սակայն Իռենն իր մեջ ուժ չէր գտնում դիմելու այդ քայլին:
Հուսահատության պահին, երբ Իռենը միայնակ զբոսնում էր փողոցում հանդիպեց Հայկին, անկեղծացավ ու պատմեց ամեն ինչ: Հայկը դեռևս ուժգին սիրում էր Իռենին, ուստի վստահեցրեց, որ պատրաստ է ամուսնանալ Իռենի հետ, իսկ երեխային էլ ընդունել հարազատի պես: 
Այժմ Հայկն ու Իռենը արդեն յոթ տարվա ամուսիններ են: Երեխան այժմ հաճախում է հենց այն նույն դպրոցը, որն ավարտել են Հայկն ու Իռենը:

Այն, որ երեխան Հայկինը չէ, գիտեն միայն ամուսինները:
Արմանն ուսումը շարունակեց արտասահմանում, իսկ հիմա խոշոր ձեռնարկատեր է: