Կարինեն ու Հրաչն ամուսնացել էին առանց իրար սիրելու, պարզապես նրանց ամուսնությունն ասես ձեռնտու գործարք էր ծնողների համար: Հրաչն ապահոված ընտանիքից էր, ուստի Կարինեի ծնողներին շատ ձեռնտու էր իրենց աղջկան ամուսնացնել Ռուսաստանից Հայաստան ժամանած իրենց նախկին հարևանի որդու հետ: Հրաչը բարդ բնավորություն ուներ, իսկ նրա ծնողների նպատակն էր որդուն ամուսնացնել համեստ ու առաքինի աղջկա հետ:

Մինչ ամուսնանալը հանդիպել էին ընդամենը մեկ ամիս, իսկ հանդիպումներն էլ տևել էին ընդամենը 1-2 ժամ: Ընդհանուր ոչինչ չունեին, միմյանց կապում էին միայն ծնողների` իրենց զավակներին միասին տեսնելու ցանկությունը:

Կարինեն բարձրագույն կրթություն չուներ, վարսահարդարման դասընթացներ էր ավարտել, իսկ Հրաչը բարձրագույն կրթություն ուներ, Մոսկվայում էլ` բիզնեսներ:

Ամուսնությունից հետո տեղափոխվեցին Մոսկվա, որտեղ ապրում էին Հրաչի ծնողների հետ: Հենց այդտեղ էլ Կարինեն պարզեց, թե Հրաչի ծնողներն ինչու էին այդքան ցանկանում որդուն ամուսնացնել ու այն էլ իր հետ, այլ ոչ օրինակ իրենց շրջապատից հարուստ ընտանիքի աղջկա:

Պարզվեց, որ Հրաչը խաղամոլ է, իսկ ծնողները կարծում էին, որ ընտանիք կազմելուց հետո ամեն բան կփոխվի, սակայն ոչինչ էլ չփոխվեց: Նա օրերով լուսացնում էր խաղատներում, իսկ տուն էր վերադառնում առավոտյան` վատ տրամադրությամբ` հարբած վիճակում:

Երբ կինը բարկանում էր ամուսնու վրա` մի անգամից բռնություն էր նրա հանդեպ կիրառում` ազատություն տալով ձեռքերին: Սկզբում Կարինեն ծնողներին ոչինչ չէր ասում` չցանկանալով անհանգստացնել: Երեք ամիս անց պարզվեց, որ երեխայի է սպասում: Այդպիսով նա հույս ուներ, որ կկարողանա ամուսնուն ընտանիքին կապել և ազատել վատ սովորությունից:

Լուրն իմանալուն պես Հրաչն էլ կնոջը խոստացավ, որ էլ խաղատուն ոտք չի դնի, սակայն ընկերոջ մեկ զանգը հերիք էր, որ դրժեր խոստումը: Նույն օրը տուն վերադարձավ կրկին հարբած ու զայրացած, անգամ մոռացել էր առավոտյանբ կնոջ հաղորդած լավ լուրի մասին: Կարինեն կրկին սկսեց հանդիմանել նրան, իսկ նա` ձեռքերին ազատություն տալ: Հարվածներն այս անգամ ավելի ուժգին էին, քան նախկինում, քանի որ Հրաչի ծնողներն այս անգամ տանը չէին, որպեսզի ինչպես միշտ զսպեին որդուն: Ի վերջո Կարինեին տեղափոխեցին հիվանդանոց, սակայն երեխայի կյանքը փրկել չհաջողվեց:

Թեպետ Հրաչի ծնողները դեմ էին, սակայն այս դեպքից հետո Կարինեն վերադարձավ Հայաստան: Նա այդպես էլ չկարողացավ նոր ընտանիք կառուցել, իսկ Հրաչը քամուն տվեց իրենց ողջ ունեցվածքը: