Անահիտի աչքերին մինչ օրս արցունքներ են հայտնվում, երբ հիշում է այդ օրը...
Ճերմակ հարսի զգեստ, հուզախառն ժպիտով հայացքներ, ձեռքին սպիտակ վարդերի փունջ, իսկ հետո հանկարծ` ուժգին ու ցավոտ ապտակ, որը մինչ օրս զգում է, բայց ոչ թե այտերին, այլ հոգու խորքում:
Ուղիղ մեկ տարի առաջ Անահիտը որոշեց, որ այլևս չի տառապելու ամուսնացած տղամարդու սիրուց, այլ իր կյանքը կապելու է իրեն սիրող ու գնահատող Վիգենի հետ: Անահիտը Վիգենին չէր պատմել, որ շուրջ երեք տարի հանդիպել է ամուսնացած տղամարդու հետ ու որ սիրում է նրան: Վիգենը զգում էր, որ Անահիտն իրեն երջանիկ չի զգում իր կողքին, սակայն վստահ էր, որ ամուսնանալուց հետո ամեն ինչ կփոխվի, և իրեն կհաջողվի երջանկացնել Անահիտին: 
Նա չափազանց ուշադիր էր Անահիտի հանդեպ, ամեն շաբաթ նրան անակնկալներ էր մատուցում` ճոխ նվերներ շռայլում: Անահիտը գնահատում էր Վիգենի բոլոր քայլերը ու որոշել էր ամեն բան անել` մոռանալու իր նախկին ընկերոջը, ով ամուսնացած էր և անգամ զավակ ուներ: Վերջինս երեք տարի շարունակ խոստանում էր, որ կբաժանվի կնոջից ու Անահիտի հետ ընտանիք կկազմի, սակայն տարիներն անցնում էին, իսկ նա որևէ քայլ չէր ձեռնարկում:
Ի վերջո, Անահիտը դրական արձագանքեց Վիգենի ամուսնության առաջարկին: Ճոխ հարսանիք էին նախատեսում. շուրջ 500 հյուրեր, շքեղ հարսանյաց զգեստ, ռեստորան… մի խոսքով իսկական հեքիաթային հարսանիք: Մինչև վերջին պահը Անահիտը վստահ էր, որ այդ օրն իր կյանքում շրջադարձային կլինի, Վիգենին կհաջողվի իրեն երջանկացնել, սակայն եկեղեցու խորանի մոտ Անահիտը «հնազանդ եմ» արտահայտության փոխարեն ասաց. «Վիգեն ես այլ տղամարդու եմ սիրում»…
Դրան հաջորդած իրադարձություններն Անահիտն այժմ չի էլ հիշում… խոսքերն արտասանելուց հետո միայն ուժգին ապտակն է տպավորվել, որից հետո էլ ուշագնաց էր եղել:
Վիգենն Անահիտին այդպես էլ չներեց, հետագայում իմացավ Անահիտի ու նրա ամուսնացած ընկերոջ հարաբերությունների մասին: 
Անահիտն այժմ միայնակ է, իսկ Վիգենը մեկնել է Անգլիա և այնտեղ ընտանիք է կազմել:
Զղջու՞մ ես արդյոք քո արածների համար հարցին, Անահիտը երկար մտածելուց հետո պատասխանում է. «Զղջում եմ ոչ թե արածների, այլ չարածների համար: Ընտանիքը պետք է կառուցվի սիրո հիմքի վրա, իսկ ես դա չափազանց ուշ գիտակցեցի: Լավ կլիներ, որ նույնը հասկանար նաև իմ նախկին ընկերը, ով կնոջ հետ ամուսնացել է չսիրելով: Եթե նա էլ դա գիտակցեր, գուցե այժմ երջանիկ կլիներ` ինձ էլ երջանկացնելով»: