Քանի՞ անգամ ենք լսել «Չեմ կարող ապրել առանց նրա» կամ «Կմեռնեմ առանց նրա» արտահայտությունները: Ի պատասխան շրջապատը հանգստացնում է. «Կյանքը չի ավարտվել, ամեն ինչ կհարթվի» կամ «Ժամանակը բուժում է»: Սակայն ոչ բոլորը գիտեն, որ նաեւ սիրային կախվածություն հասկացություն գոյություն ունի: Այն կախվածության տեսակ է, ինչպես, օրինակ, թմրանյութից, ակլոհոլից կամ խաղային մեքենաներից կախվածությունը:

Չնայած շատերն իրենք են ընդունում սիրուց կախվածությունը: Եվ նրանք անկեղծորեն կարծում են, որ ցավը հատուկ է սիրուն, չնայած դա իրականում կախվածության արդյունք է: Որոշ հոգեբաններ կարծում են, որ կախվածությունն ավելի տարածված է, քան իրական սերը: Ինչպե՞ս հասկանալ, որ դա հենց կախվածություն է եւ ինչպե՞ս հաղթահարել այդ «հիվանդությունը»՝ կպատմի հոգեբան ԱրմենՀովսեփյանը:

«Հարաբերություններում կախվածությունը «սիրելիի» հանդեպ մտքերի մշտական կենտրոնացումը եւ նրանից կախվածությունն է: Կախվածությունը հիմնականում որոշվում է մարդու զգացմունքային, ֆիզիկական վիճակով, նրա աշխատունակությամբ եւ այլ մարդկանց հետ հարաբերությամբ: Այսինքն, կախված մարդու ամբողջ կյանքը որոշվում է այդ հարաբերություններով: Եվ այդ հարաբերությունները կյանքի վրա ազդում են ամենեւին էլ ոչ լավագույն կերպով: Դրանք մարդուն ավելի շատ դարձնում են ապերջանիկ, քան երջանիկ:

Կախվածությամբ պայմանավորված հարաբերություններում իրական մտերմություն չկա, իրական վստահությունը բացակայում է: Ընդ որում, հարաբերությունները կարող են զգացմունքայնորեն հագեցած լինել, ինչը կարող է ընդունվել որպես սեր. «Խանդում է, նշանակում է՝ սիրում է»: Կախվածությամբ պայմանավորված հարաբերություններում մարդիկ միմյանց օգտագործում են իրենց չգիտակցված պահանջմունքները բավարարելու համար: Բայց այդ պահանջմունքներն այդպես էլ մնում են չբավարարված:

Հոգեբանական կախվածությունից ազատվելու համար հարկավոր է պայքարել կրքի դեմ: Միայն այդ դեպքում է հնարավոր հասնել իրական ազատության, դառնալ լիարժեք, ուժեղ մարդ, ով չի գանգատվում, թե իր իսկ զգացմունքներն իրեն գերի են դարձրել եւ թույլ չեն տալիս երջանիկ լինել: Դա հոգեւոր աճի, սեփական հոգու դաստիարակության եւ կատարելագործման ճանապարհն է, որի սկիզբն ու հիմքը կյանքի եւ սեփական անձի հանդեպ սթափ հայացքի ձեւավորումն է: Որքան ավելի սթափ ենք մենք դիտում ինքներս մեզ եւ իրավիճակին, այդքան ավելի քիչ ենք կախված իրավիճակից, մեր զգացմունքներից, զուգընկերոջից… եւ այդքան քիչ բան կարող է մեզ հանել հավասարակշռությունից»:

NEWS.am STYLE