43-ամյա Հովհաննես Հայրապետյանը, գտնվելով հարկադիր բուժման մեջ, «Հոգեբուժական բժշկական կենտրոն» ՓԲԸ Նուբարաշենի հոգեբուժական կլինիկայում բաժանմունքի ճաշարանում, այնուհետեւ ճաշարանի դիմաց հարձակվել է նույն բաժանմունքում բուժվող Ավետիք Ստեփանյանի վրա, ձեռքերով ու ածելիով հարվածներ է հասցրել վերջինիս ու նրա առողջությանը պատճառել ծանր վնաս: Էրեբունիի ընդհանուր իրավասության դատարանից NEWS.am-ը տեղեկացավ, որ սույն գործը քննվելու է իրենց մոտ:

Գործի նյութերի համաձայն՝ 43-ամյա Հովհաննես Հայրապետյանին մեղադրանք է առաջադրվել այն բանի համար, որ նա, գտնվելով հարկադիր բուժման մեջ, «Հոգեբուժական բժշկական կենտրոնի» Նուբարաշենի հոգեբուժական կլինիկայի 7-րդ բաժանմունքի ճաշարանում, այնուհետեւ ճաշարանի դիմաց հարձակվել է նույն բաժանմունքում բուժվող Ավետիք Ստեփանյանի վրա, ձեռքերով ու ածելիով հարվածներ է հասցրել վերջինիս ու նրա առողջությանը պատճառել ծանր վնաս: Տուժող Ավետիք Ստեփանյանը դատարանին հայտնել է, որ 2006թ-ից հարկադիր բուժման մեջ է գտնվում Նուբարաշենի հոգեբուժարանում: Դեպքի օրը, երբ հիվանդներով գնացել են ճաշարան, ընթացքում Հովհաննես Հայրապետյանը հանկարծակի հարձակվել է իր վրա եւ ձեռքին եղած ածելիով ծակել իր դեմքի աջ եւ ձախ այտերը, ինչից հետո դեմքից արյուն է եկել, դեմքը կապել են, շտապօգնություն կանչել եւ տարել հիվանդանոց:

Հիվանդանոցում վերքերը կարել են եւ հետ բերել հոգեբուժարան: Քրեական գործ է հարուցվել 112 հոդվածի 1-ին մասով` դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար: Քննելով գործը դատարանը վճռել է անմեղսունակության վիճակում քրեական օրենքով չթույլատրված արարք կատարած Հովհաննես Հայրապետյանին ազատել քրեական պատասխանատվությունից եւ պատժից: Հայրապետյանի նկատմամբ կիրառվել է հարկադիր բուժում՝ հատուկ տիպի հոգեբուժական հիվանդանոցում: