Հրազդանում ամուսինների միջև ընտանեկան վեճը ծանր հետևանքներ է ունեցել նրանց ընտանիքի վրա` կինը կուրացել է, իսկ ամուսինը Կոտայքի մարզի ընդհանուր իրավասության դատարանի վերջերս կայացրած դատավճռով դատապարտվել է 3 տարի ազատազրկման: 

Ամուսիններ Կարո Օհանյանի և Մարինե Կարապետյանի միջև վեճը տեղի է ունեցել դեռևս 2011-ի հունիսին, Հրազդանում գտնվող Մարինեի հայրական տանը: Կենցաղային հարցերի շուրջ ծագած վիճաբանության ժամանակ բռունցքներով մի քանի անգամ հարվածել է կնոջ դեմքի և գլխի շրջանին, որի հետևանքով երիտասարդ Մարինեն երկու աչքերից կուրացել է: 2011-ի հուլիսին կատարվել է Մարինեի միայն ձախ աչքի վիրահատություն, որի արդյունքում վերջինիս ձախ աչքի տեսողությունը փոքր-ինչ վերականգնվել է:

Սակայն կատարվածի հետևանքները այսքանով չեն սահմանափակվել և միջամտել են իրավապահները. Հարուցվել է քրեական գործ` ՀՀ քրեական օրենսգրքի 112 հոդվածի 1-ին մասի հատկանիշներով` «Դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որևէ օրգանի կամ օրգանի ֆունկցիայի կորուստ»:

2012-ի հոկտեմբերին 29-ամյա Կարո Օհանյանը կալանավորվում է: Իսկ դատաքննությունը, ինչպես տեղեկանում ենք գործի նյութերից, ամբաստանյալի միջամտությամբ ընթացել է արագացված ընթացակարգով: Նա իր նկատմամբ առաջադրված մեղադրանքում իրեն մեղավոր է ճանաչել և զղջացել է իր կատարած արարքի համար:

Դատաքննության ընացքում պարզվել է ու ապացուցված համարվել Օհանյանին Քրեական օրենսգրքի այդ հոդվածով առաջադրված մեղադրանքը: Եվ օրերս Կոտայքի մարզի ընդհանուր իրավասության դատարանի կայացրած դատավճռով Կարո Օհանյանը դատապարտվում է 3 տարի ազատազրկման: Նրա պատժաչափը հաշվարկվելու է 2012-ի հոկտեմբերից:

Հ.Գ. Հրապարակման մեջ մարդկանց անունները պայմանական են: