Ողջունելի է, երբ հայկական շոու բիզնեսի աստղերը հաջողության են հասնում ոչ միայն երգարվեստում, այլև բիզնեսի ոլորտում, հատկապես, 

եթե բիզնեսով զբաղվում են հենց Հայաստանում, ոչ թե արտերկրում: Բիզնեսի ոլորտում, ի թիվս այլ երգիչների, փորձում է հաջողության հասնել նաև ռեփեր ՀՏ Հայկոն: 

Թե բիզնեսի որ ոլորտում է ցանկանում հաջողության հասնել ռեփերը և կոնկրետ ինչ նպատակներ ունի, փորձեց պարզել mardik.am-ը՝զրուցելով ռեփերի հետ:

Հայկ, բավականին հոգնած տեսք ունեք, հավանաբար շատ եք աշխատում: Կարծում եմ ՝ նորություններ կունենաք Ձեր երկրպագուների համար:

ՀՏ Հայկո- Հոգնած չեմ, ավելի ճիշտ՝ խառն եմ: Ուղեղս անընդհատ աշխատում է, ընդ որում՝ ոչ միայն ստեղծագործական ուղղությամբ: Ցանկանում եմ բիզնեսով զբաղվել: Մինչև Նոր տարի Սարյան փողոցի վրա պիտի սրճարան բացվի: Հիմա սրճարանի բացման աշխատանքներն են գնում: Սա իմ առաջին լուրջ բիզնեսն է: Հետագայի համար ավելի լուրջ պլաններ ունեմ:

–Իսկ դա չի՞ խանգարի ստեղծագործական աշխատանքին, թե՞ կարող եք համատեղել և՛ բիզնեսը, և՛ երգը:

ՀՏ Հայկո-Պետք է համատեղեմ:

- Հայաստանում ցանկանում եք բիզնեսով զբաղվել, սակայն Ձեր գործընկերներից շատերից հաճախ կարելի է լսել՝ այստեղ երգարվեստի միջոցով հնարավոր չէ գումար վաստակել: Դուք կարծես թե այդ խնդիրը չունեք:

ՀՏ Հայկո- Գումար վաստակելու խնդիր միշտ ունեցել եմ, բայց գումար վաստակելու պրոցեսը Հայաստանում ստաբիլ չէ՝ մի որոշ ժամանակ ունենում ես եկամուտ, հետո չես ունենում: Շուկա չկա, մարդիկ են քիչ: Բայց շատերի նման չեմ մտածում այստեղից փախչել:

-Հետաքրքիր է՝ երիտասարդների մեծ մասը, ցավոք, փորձում է կայանալ դրսում: Ինչն է ձեզ պահում Հայաստանում:

ՀՏ Հայկո-Ես համոզված եմ՝ ուրիշ տեղ չեմ կարող երջանիկ լինել անկախ փողի քանակից: Հայը կարող է երջանիկ լինել միայն իր երկրում: Ես փորձում եմ անել ամեն ինչ, եթե այն ամենը, որը ես անեմ 100%-ով, չստացվի, ասենք թե` երկրի պատճառով, չնայած ես այդ միտքը՝ երկրի վրա ամեն ինչը բարդելու կարծիքը, համարում եմ միֆ, որովհետև անհնարին բան չկա կյանքում, նոր երևի կմտածեմ դուրս գալու մասին: Մեկ-երկու անհաջողությունից հետո մեզ մոտ մարդիկ իրերը հավաքում ու գնում են երկրից: Դա էլ պետք է փոխել մարդկանց գիտակցության մեջ: Պարզապես պետք է հիշել՝ Հայաստանն այն երկրներից է, որտեղ կարող է 9 բան չստացվի, 10-րդը ստացվի:

- Նոր տեսահոլովակ և նոր երգ նախատեսե՞լ եք Ձեր ունկնդիրների համար:

ՀՏ Հայկո-Երկու տեսահոլովակ մինչև Նոր տարի պիտի նկարահանենք: Բայց պրեմիերաները կլինեն, հավանաբար, մյուս տարի: Տեսահոլովակներից մեկում հնչող երգը մի ֆիլմի սաունթրեկ է լինելու: Ֆիլմի պրեմիերան կլինի մարտին: Մյուս տեսահոլովակում հնչող երգը կլինի զուգերգ: Աշխատում եմ նաև նոր ալբոմիս վրա, որը ևս, հավանաբար, կթողարկվի գալիք տարի:

Այս ամենի հետ մեկտեղ զբաղվում եմ նաև հասարակական գործունեությամբ: Կա նորաստեղծ հկ՝ «Քաղաքացիական գիտակցություն» անունով: Ես խորհրդի անդամներից մեկն եմ: ՀԿ-ի նպատակն է փոխել մարդկանց՝ հատկապես երիտասարդների գիտակցությունը: Անցկացվում են սեմինարներ, շոշափվում տարբեր թեմաներ, որոնց մասին խոսում են մասնագետները:

-Կոնկրետ ինչն եք ուզում փոխել մարդկանց մեջ:

ՀՏ Հայկո-Ամեն ինչ: Փոխել ասելով՝ նկատի ունեմ հետևյալը. հասկանալ` ինչ է կատարվում իրականում: Ես էլ եմ խորանում անցկացվող սեմինարների թեմաների մեջ, քանի որ ինձ էլ է հետաքրքիր: ՀԿ-ը նմանվում է ավելի շատ այլընտրանքային ուսումնական կենտրոնի:

-Շատերի մոտ հարց կառաջանա՝ Հայաստանում գործում են տասնյակ նման հկ-ներ, որոնք ևս ցանկանում են ինչ-որ բան փոխել, սակայն արդեն 20 տարի է՝ էական հաջողությունների չենք հասնում: Ինչո՞ւ եք համոզված, որ «Քաղաքացիական գիտակցությունը» կկարողանա ինչ-որ բան փոխել:

ՀՏ Հայկո-Ես համոզված չեմ: Ես ուղղակի նպատակ ունեմ և ուզում եմ դրան հասնել: Ես ուզում եմ ինձնից հետո ինչ-որ բան թողնել: Կարող է և չստացվի, բայց եթե մի քանի հոգու մոտ ինչ-որ բան փոխվի, արդեն լավ է:

Mardik.am- Ասացիք՝մի ֆիլմի սաունթրեկի վրա եք աշխատում: Հիշեցի, որ մի շրջան որպես դերասան էիք հանդես գալիս: Հիմա ունե՞ք նման առաջարկներ:

ՀՏ Հայկո- Առաջարկներ շատ- շատ եմ ստանում: Բայց հիմնականում սերիալներում խաղալու առաջարկներ են…

-Ի դեպ, ինչպե՞ս եք սերիալներին վերաբերվում:

ՀՏ Հայկո- Սերիալն այնպիսի բան է, որ պետք է լինի: Այլ հարց է՝ ինչպես է այն մատուցվում: Ես շատ կուզենայի, որ մարդիկ պարապ ժամանակ չունենային, որպեսզի սերիալները գոյություն չունենային: Բայց քանի որ կա պարապ մարդկանց մի զանգված, ով փորձում է, չգիտես ինչու, ցրվել սերիալների միջոցով, ուրեմն դրանք պետք է լինեն: Այսինքն՝ այս դեպքում պահանջարկն առաջարկ է ծնում: Բայց առաջարկվածն էլ պետք է որակյալ լինի: Այնպես չէ, որ ես հակասերիալիստ եմ, պետք է պայքարեմ սերիալների դեմ, ոչ: Սերիալները դեռ եկամուտ են ապահովում, բացի այդ՝ պահանջարկ կա: Առայժմ սերիալների մատուցման ձևն ինձ չի բավարարում:

- «Պրոֆեսոր Մարգարյան» և «Անտիսիստեմ» երգերը բավականին մեծ արձագանք ունեցան, ավելին՝ ասում են, որ սրանք ավելի լավ, որակյալ գործեր էին, քան նախորդները…

ՀՏ Հայկո-Որակի առումով, այո, համաձայն եմ: Ես չեմ սիրում տեղում դոփել, փորձում եմ անընդհատ նոր բան անել, բայց հին գործերս չեմ ուզում անտեսել:

Mardik.am- «Անտիսիստեմ» երգից մի միտք առանձնացրի՝«մենք արդեն համախմբվել ենք, որ հեղափոխենք: Հեղափոխությունը քաղաքական կատեգորիա է: Շատերը հեղափոխություն ասելով իշխանափոխություն են հասկանում: Ձեզ համար ինչ է հեղափոխությունը:

-Անհատի ներսո՞ւմ եք ցանկանում հեղափոխություն առաջացնել:

ՀՏ Հայկո-Այո, ամենամեծ հեղափոխությունը լինում է անհատի ներսում: Բոլոր այն հեղափոխությունները, որոնք եղել են ժամանակին, դրանք արդեն ծեծված են ու շաբլոն: Դրանցով ոչ մի բան չի փոխվել, քանի որ մարդիկ չեն փոխվել: Ամբոխը դեռ մարդիկ չեն: Անձը պետք է փոխվի, նոր ամբոխը: Ամբոխը մարդկանց այնպիսի մի խումբ է, ով առաջնորդվում է ինչ-որ լիդերով: Սակայն ամբոխի 80%-ը չի հասկանում ՝ինչի համար է հետևում այդ լիդերին:

-Անհատի հեղափոխության միտումներ, նախադրյալներ կա՞ն:

ՀՏ Հայկո-Կան անհատներ, ովքեր ուրիշ կերպ են մտածում, ինչպես ես: Ես ուզում եմ այդ մարդկանց թիվն ավելացնել: Ես չեմ ուզում՝ մարդիկ ինձ նմանվեն, հակառակը` մարդիկ պետք է լինեն այնպիսին, ինչպիսին իրենք կան: Ես իմ մեջ շատ բաներ փոխել եմ, և շատ բաներ էլ կփոխվեն:

- Հայկ, կարծիք կա, որ ռեփի ժանրն առաջանում է այն երկրներում, որտեղ բողոք և սոցիալական խնդիրներ կան: 20 տարի է՝ այդ խնդիրները կան Հայաստանում, բայց ժանրն այն մակարդակին չէ, ինչպես դրսում: Ինչո՞վ է դա պայմանավորված:

ՀՏ Հայկո-Պայմանավորված է ժանրի նոր լինելով: 10 տարի է, ինչ գոյություն ունի հայկական ռեփը: 10 տարին քիչ ժամանակահատված է ժանրի զարգացման համար: Չնայած կարող էր ժանրն ավելի մեծ տեմպերով զարգանար, եթե խանգարող հանգամանքներ չլինեին: Օրինակ` ժանրը շատերի կողմից չընդունվեց…

-Միգուցե ռեփի լեզուն է պատճառը՝ խոսակցական, հաճախ նաև հայհոյանքներով ուղեկցվող:

ՀՏ Հայկո-Դա մի կողմ: Ամեն ինչ սովորելու վրա է: Ժողովուրդը մեզ լավ ընդունեց այն ժամանակ, երբ «Հայ տղեք»-ով էինք սկսել: Բայց եղավ մի զանգված, որը կատեգորիկ չընդունեց ռեփը և խանգարեց մեզ: Սակայն այդ դժվար ժամանակահատվածն արդեն անցել է: Հիմա ռեփը պրոգրես է ապրում և դեռ աճելու տեղ ունի: Պետք է այնպես անել, որ ունկնդրի ականջին հաճելի լինի ռեփը:

- Հայկ Մարգարյանն ինչպե՞ս դարձավ ՀՏ Հայկո, «Հայ տղեք» խմբի անվանումի՞ց դա մնաց:

ՀՏ Հայկո-Այո, հետագայում հայ տղան կրճատվեց դարձավ ՀՏ, որը ես սարքեցի առանձին բրենդ:

- Որպես հայ տղա՝ 21-րդ դարի հայ տղայի մեջ ինչ-որ բան փոխվե՞լ է, հպարտանալու տեղ ունե՞նք:

ՀՏ Հայկո- Այո, փոխվել է ինչ-որ բան և ամեն օր է փոխվում: Մանավանդ երիտասարդների մեջ: 1990-ականներին ծնվածների մեջ լավ երեխեք կան: Ես փորձում եմ միշտ լավը նկատել ու լավը շեշտել:

- Կարծիք կա, որ այսօր հայ տղամարդկանց երկու խումբ կա՝ մեկը ազգային ավանդույթներին հետևող և եվրոպական ցանկացած արժեք մերժող, և տղաների մի խումբ, որն արտաքուստ է միայն եվրոպամետ հագուկապով, սանրվածքով, բայց կարևոր հարցերում ասիացու մտածողությունը եվրոպամետ տղաների մեջ գլուխ է բարձրացնում: Դուք Ձեզ ո՞ր խմբի մեջ եք տեսնում:

ՀՏ Հայկո-Կա մեր արյան մեջ դա, այո: Չեմ ասի` դա թերություն է, բայց այդ քյառթու պահերն իմ մեջ կան: Ամենաեվրոպամետ հայ տղամարդու մեջ էլ կան քյառթու պահեր, որոնք որոշ դեպքերում ճիշտ են: Ես չեմ ուզում, որ մենք այնքան նման լինենք եվրոպացու, որ մեզ չտարանջատեն նրանցից: Մեզ մոտ հիմա այսպիսի ապուշ տենդենց կա: Չիմանալով` Եվրոպայում իրականում ինչ է կատարվում, ամեն կերպ ձգտում են դեպի Եվրոպա: Պետք է նրանց մշակույթը լավ ուսումնասիրել, հետո քոնը դնել նրանց կողքին և համադրել: Ես կյանքից վերցնում եմ ամենալավը, այն, ինչն ինձ հարազատ է:

-Կին և տղամարդ հարաբերություններում էլ հաճախ կանգնում ենք երկընտրանքի առաջ՝ հարաբերությունները կառուցել ինչպես Եվրոպայում է ընդունված, թե հարազատ մնալ ավանդականին:

ՀՏ Հայկո-Մեզ մոտ մարդու անձնական կյանքը շատ է կուլտացված (պաշտամունքի առարկա դարձված-խմբ.): Կարծում եմ՝ զույգը պետք է անի այնպես, ինչպես ինքը հարմար է գտնում:

- Բայց Ձեր երգերից մեկում՝ «Փչացած սեր», կարծես այլ բան եք խորհուրդ տալիս՝ հարազատ մնալ ավանդական մտածելակերպին:

ՀՏ Հայկո-Դե, երկու կողմի՝ և՛ տղայի, և՛ աղջկա մեղավորությունն էլ կա, եթե անձնական կյանքում ինչ-որ բան չի ստացվում: Տղաների մտածելակերպից է բխում աղջիկների մտավախությունը, աղջիկների պահվածքից էլ` տղաների մտավախությունը: Սա է պատճառը, որ մեզ մոտ ամեն ինչ թաքուն է լինում, իսկ դա վատ է: Մարդկանց մեջ այսօր սուտը, ինքնախաբեությունը շատ են :

- Նախընտրական շրջանում, չգիտես ինչու, միշտ հիշում եմ Ձեր երգերից մեկը՝ «Սպանեք իրար», որտեղ հասարակության վրա գողական աշխարհի և մաֆիայի ազդեցության մասին է խոսվում: Հաճախ այդ ազդեցությունը հանգեցնում է բախումների: Նախընտրական այս շրջանում կա՞ նման մտավախություն:

ՀՏ Հայկո- Ես ընտրություններին մատների արանքով եմ նայում: Կարող է ինչ-որ չափով սխալ եմ, բայց ինչքանով որ խորացել եմ քաղաքականության մեջ, հասկացել եմ մի բան՝ այն ամենը, ինչ տեղի է ունենում այսօր, մեծ և շատ ճիշտ կառուցված թատերաբեմ է:

-Բայց եթե Դուք կոչ եք անում քաղաքացիական գիտակցություն ունենալ, ապա չպետք է մատների արանքով նայեք ընտրական գործընթացին, որը ևս քաղաքացիական գիտակցության մի դրսևորում է:

ՀՏ Հայկո-Չէ, այդպես չէ: Ընտրությունների բուն իմաստն այն է, որ ընտրում ես մեկին:

-Ընտրում ես քո ապագան:

ՀՏ Հայկո- Չէ, Հայաստանում այդպես չի: Քո ապագան ինքդ ես կառուցում: Եթե մարդկանց մեջ գիտակցությունը փոխվի, իրենք հասկանան՝ ով ով է, ապա ընտրությունները մաքուր կգնան: Եթե մարդու գիտակցությունը փոխվում է, փոխվում է նաև հասարակությունը:

-Կարծում եք՝ այսօրվա իրավիճակի պատասխանատուները դա չե՞ն հասկանում:

ՀՏ Հայկո-Շատ մարդիկ դա չեն գիտակցում: Մեզ մոտ կա այսպիսի մտածելակերպ՝ սեփական սխալի համար ուրիշին են մեղադրում: Պետք է խնդիրներից չփախչել, այլ մտածել դրանք լուծելու մասին:

Զրուցեց Սոնա Դավթյանը

http://mardik.am