''Սինջար'' եզդիների ազգային միավորում ՀԿ խորհուրդն օրերս հանդես է եկել հայտարարությամբ, որով պահանջում է եզդիների համար ոչ մի բացառություն չսահմանել ամուսնության տարիքի նվազագույն շեմի հարցում: Կազմակերպությունն այս հայտարարությունը հիմնավորում է նրանով, որ եթե եզդի աղջիկներին թույլատրվի ամուսնանալ 16 տարեկանում, կխախտվեն եզդիների` որպես ՀՀ լիիրավ քաղաքացիների իրավունքները: ''Սինջար'' եզդիների ազգային միավորում ՀԿ խորհրդի նախագահ Բորիս Թամոյանն ''Աշխարհի եզդիների միության'' նախագահ Ազիզ Թամոյանից պահանջում է չվիրավորել եզդի աղջիկներին.

''Ի՞նչ է նշանակում Ազիզ Թամոյանի հետևյալ արտահայտությունը. ''18 տարին լրացած չամուսնացած, ուսանող եզդի աղջիկն արդեն ''պառաված'' է և պոտենցյալ անբարոյական'': Եթե անգամ կառավարությունն օրենք է ընդունում, թող ոչ ոք չվիրավորի եզդի աղջիկներին, ովքեր ուզում են սովորել կամ 18 տարեկանում դեռևս չեն ամուսնացել: Մեր իշխանություններին ձեռնտու են Ազիզ Թամոյանի նման խավարամիտ անձնավորությունները: Ազիզ Թամոյանն ինքն է իրեն մեր համայնքի առաջնորդ նշանակել: Եթե ինքն իրեն համարում է մեր համայնքի ղեկավար, թող ՀՀ կառավարությունում ներկայացնի մեր իրական շահերը, ոչ թե հանդես գա ցինիկ արտահայտություններով ու անձնական բնույթի վիրավորանքներ հնչեցնի մեր հասցեին'',- ասել է Բորիս Թամոյանը և հավելել. ''Եթե ՀՀ կառավարությունը հաշվի է առնում մեր կրոնական ավանդույթները, թող հաշվի առնի նաև այն հանգամանքը, որ կրոնական ավանդույթների համաձայն, եզդի երիտասարդը չի կարող բանակում ծառայել: Ես դեմ չեմ հայոց բանակում ծառայելուն, ինքս արդեն անցել եմ պարտադիր զինվորական ծառայությունը, բայց եզդիական կրոնական ավանդույթների համաձայն` երբ մենք աղոթում ենք, շրջապատում ուրիշ կրոն դավանող ոչ մի մարդ չպիտի լինի, իսկ բանակում դա անհնար է պահպանել'':

Իսկ օրերս եզդիների Շեյխ Բրո Հասանյանի այն արտահայտությունը, թե ինքը կասկածում է Բորիս Թամոյանի եզդիականության վրա, ''Սինջար'' եզդիների ազգային միավորում ՀԿ խորհրդի նախագահը մեկնաբանեց հետևյալ կերպ. ''Ինչպես կարող է մեր կազմակերպությունը և, մասնավորապես, ես կապ ունենամ քրդերի հետ, եթե մենք 2007թ. Իրաքում քրդերի կողմից 1000 եզդիների սպանությունը դատապարտելու խնդրանքով դիմել ենք նախագահին: Նա այդ արտահայտությամբ բառացիորեն կրկնում է Ազիզ Թամոյանի միտքը'':

mamul.am