Ինչպես տեղեկացրել էինք, այսօր առավոտյան Կոտայքի մարզի
Պռոշյան գյուղի գյուղապետարանի դիմաց հայտնաբերվել է
գյուղապետ Հրաչ Մուրադյանի դին: Yerkir.am-ի փոխանցմամբ՝
շրջանառվող վարկածը, թե գյուղապետը հանկարծամահ է եղել,
հերքվում է, քանի որ գյուղապետի գլխին՝ աջ ականջի մոտ,
հրազենային մահացու վնասվածք է հայտնաբերվել: Գյուղացիները
նշում են, որ հնչել է երկու կրակոց, սակայն տարածքի հետազոտման
ժամանակ պարկուճ դեռևս չի հայտնաբերվել:
Հրաչ Մուրադյանի ընտանիքը 1966 թվականին Հայաստան է
տեղափոխվել Սիրիայից: Նա ծնվել էր 1963թ. հուլիսի 1-ին, Պռոշյան
գյուղում, ավարտել է տեղի միջնակարգ դպրոցը, բարձրագույն
կրթություն ստացել Երևանի Մեսրոպ Մաշտոցի անվան
համալսարանում: Պռոշյան համայնքի ղեկավարն էր 2005 թվականից: Ամուսնացած էր, ուներ երկու դուստր և
երկու որդի:
Նա Արցախյան ազատամարտի հերոսներից էր: Լեգենդար Պետրոս Ղևոնդյանի հետ անցել է ազատամարտի
բոլոր ճակատներով՝ Շահումյանից մինչև Ֆիզուլի: Հրաչ Մուրադյանը 1990 թվականից Դաշնակցության անդամ
էր:
Գյուղացիները «Առաջին լրատվական»-ի հետ զրույցում պատմեցին, որ նա անչափ մարդկային էր, չի մերժել
գյուղացիների որևէ խնդրանք և երրորդ անգամ վերընտրվել է գյուղապետ: Թեև երկու ընտրություններին
ունեցել է ՀՀԿ մրցակիցներ, սակայն գյուղում լինելով ընդունված մարդ' նա է կրկին վերընտրվել:
Գյուղացիները պատմում էին, որ նա շատ ինքնուրույն համայնքապետ է եղել և չի ընկրկել տեղական
չինովնիկների ճնշումներից: Հավաքված մարդիկ ասում էին, որ Կոտայքի մարզում նա այն եզակի
գյուղապետերից էր, որը որոշ հարցերում դեմ է դուրս եկել Կոտայքի ՀՀԿ-ական մարզպետ Կովալենկո
Շահգալդյանին: Նա այդ առումով որոշ խնդիրներ է ունեցել նաև մարզպետի հետ: Ակնարկում էին, որ Հրաչ
Մուրադյանին գյուղապետի ընտրություններում երբեմն փորձել է խանգարել նաև նրա ՀՀԿ-ական մրցակից
Արթուր Մուրադյանը: Նաև ասում էին, որ նա ընտրությունների ժամանակ իր գյուղացիներին չի ստիպել կամ
հորդորել ընտրել իշխանության թեկնածուին:
Գյուղացիների պատմելով' տեղական իշխանություններին դուր չի եկել, որ Հրաչ Մուրադյանը կարողացել է
ինքնուրույն ֆինանսավորում գտնել և վերանորոգել գյուղի դպրոցն ու մանկապարտեզը, որոշ ճանապարհներ:
Դա նա կազմակերպել է սփյուռքահայ իր ընկերների օգնությամբ: