Գոյություն ունեն այնպիսի հատկանիշներ, առանց որոնց հաջողությունն անհնար է: Այդ հատկանիշներից մեկն ինքնավստահությունն է: Ինքնավստահություն նշանակում է ինքդ քո հանդեպ հավատ այն բանի, որ ունես բավականաչափ ուժ և ունակություններ՝ քո առջև ծառացած ցանկացած խնդիր լուծելու համար: Դա գիտակցումն է, որ քեզ շրջապատող մարդկանց աչքերում արժանավայել ես դիտվում: Ինքնավստահ մարդը գիտի, որ իր ցանկություններն արժանի են իրականանալ, գիտի, որ իր ունակություններն ու էներգիան բավարար են ուզածին հասնելու համար: Առանց ինքնավստահության դժվար է հասնել ցանկալի նպատակներին: Դժվար է գնալ որևէ քայլի, եթե գլխում առաջանում են այնպիսի մտքեր, ինչպիսիք են՝ «Իսկ կարո՞ղ եմ ես արդյոք դա անել: Արժանի՞ եմ ես արդյոք դրան: Արդյո՞ք դրված խնդիրն ավելի մեծ չէ, քան ես ինքս»: Ինչպես փորձը ցույց է տվել, այն, ինչին հասնում է մարդը, հաճախ կախված է ոչ թե նրա ունակություններից և տաղանդից, այլ ինքնավստահության ուժից: Ինքնավստահությունը տալիս է գործողությունների ազատություն, ռիսկի դիմելու և հաղթելու արիություն, սեփական անձը, կարծիքը, ապրելակերպը և հետևաբար՝ բոլոր ձեռնարկումներում հաջողությունը պաշտպանելու ուժ: Ինքնավստահ մարդն անկախ է. նա համոզված է, որ ինչպես յուրաքանչյուր մեկը, ինքը նույնպես առանձնահատուկ է: Իրոք՝ մեզնից յուրաքանչյուրը միակն է իր տեսակում, սակայն միայն նա է դա իրականում գիտակցում, ով պետք եղած ժամանակ կարող է իրեն որևիցէ մեկի քննադատությունից բարձր զգալ: Բացի այդ, ինքնավստահությունը ենթադրում է, որ Դուք կարող եք խնդրանքին մերժումով պատասխանել՝ առանց խղճի խայթ կամ եսասիրություն զգալու; ուշադրություն չդարձնել շրջապատի խորհուրդներին և հետևել սեփական համոզմունքներին՝ բացեիբաց և ազնվորեն արտահայտելով սեփական զգացմունքներն ու կարծիքները: Ինքնավստահ մարդը ենթադրում է, որ իր խոսքերն ու գործողությունները ճիշտ են, որ այն, ինչ ինքն ասաց և արեց տվյալ իրավիճակում, հենց այն էր, ինչ նա մտածում և ցանկանում էր: Նա վստահ է իր ընտրության ճիշտ լինելու մեջ: Նման մարդկանց շրջապատողները գնահատում են շփման մեջ իրենց անմիջականության, բնականության, հումորի զգացման և անկաշկանդության համար: Նրանց համար ավելի հեշտ է հասնել իրենց առջև դրված նշանակետին՝ ինքն իր և իր արարքների մեջ անփոփոխ վստահության շնորհիվ տրվող վճռականության, համառության, անկախության և սեփական կարծիքը պնդելու հաշվին: Հնարավո՞ր է արդյոք ձեռք բերել ինքնավստահության զգացում, գրում է harmoania.am Ահա մի քանի պարզ խորհուրդ.

1. Իրազեկություն: Աշխատեք լավ հասկանալ այն հարցերը, որոնցով զբաղվում եք: Որքան խորը ճանաչեք առարկան, այնքան ինքնավստահ Դուք Ձեզ կզգաք: Ծայրահեղ դեպքում դա կլինի ինքնավստահություն` առանձին վերցրած հարցերում:
2. Պահելաձև: Մարդկանց հետ շփման ընթացքում Դուք, ամենայն հավանականությամբ, կարող եք շատ հեշտ որոշել, թե արդյո՞ք այս կամ այն մարդը ինքնավստահ է, թե ոչ: Ձեզ համար հիմնական ազդանշան կհանդիսանան նրա ժեստերը, հայացքները, կեցվածքն ու խոսքը: Ինչպես ճշմարիտ է այն, որ մարդու ներքին ինքնավստահությունն արտացոլվում է նրա պահվածքի մեջ, այնպես էլ ճշմարիտ է հակառակը՝ որոշակի պահվածքը ձևավորում է իրեն համապատասխան ներքին զգացողություններ: Որոշե՛ք, թե որ պահվածքն է Ձեզ համար հանդիսանում մարդու ինքնավստահության արտացոլում: Դուք կարող եք ինքնավստահություն ձեռք բերել՝ Ձեր պահվածքում հավատարիմ մնալով այդ որակներին: Կարելի է նշել ինքնավստահ պահելաձևի մի քանի համընդհանուր հատկություններ: Ժեստեր. մարմնի դիրքը բաց է, ժեստերը համապատասխանում են խոսքին՝ իրենց տեմպով և բնույթով: Խոսքը հարթ է, առանց շտապողականության և սայթաքումների, ուղղված զրուցակցին, ձայնի բավարար բարձրությամբ: Հայացքը բաց է, ուղղված զրուցակցին: Բացի այդ, կարևոր են կեցվածքը և քայլվածքը:
3. Արտաքին տեսքը: Ձեր արտաքին տեսքը չպետք է մտքեր առաջացնի այն մասին, որ Ձեր մեջ ինչ-որ բան այն չէ: Ձեր մտքերն արտացոլվում են Ձեր պահվածքի մեջ, և արտաքին տեսքի առումով Ձեր անվստահությունը հավանաբար կազդի Ձեր ինքնավստահության ընդհանուր մակարդակի վրա: Դա բացառապես սուբյեկտիվ հարց է: Եթե Ձեզ դուր չի գալիս Ձեր ֆիզիկական տեսքն, ապա զբաղվեք այն կարգի բերելով: Եթե գտնում եք, որ հագուստը Ձեզ չի սազում, ապա զբաղվեք պահարանով, որպեսզի հայելու մեջ Ձեր արտացոլանքի վրա գցած հայացքը դրականորեն ազդի Ձեր ինքնավստահության վրա:
4. Ընդօրինակման նմուշ: Ամենից լավ մարդը սովորում է կենդանի օրինակների վրա: Գտեք Ձեզ համար ընդօրինակման նմուշ՝ մարդու, որն ըստ Ձեզ անկասկած ունի բարձր ինքնավստահություն: Դա կարող է լինել մարդ Ձեր շրջապատից կամ անձամբ Ձեզ անծանոթ, բայց մեկն ում ուսումնասիրության համար կունենաք բավարար նյութեր, այդ թվում նաև՝ տեսանյութեր: Տեսեք, թե ինչ կարող եք վերցնել Ձեզ համար՝ խոսքի, ժեստերի, հայացքների, հագուստի հանդեպ մոտեցումների յուրահատկություններ:
5. Ակտիվություն: Ինքնավստահության ամրապնդման մեջ շատ քիչ բան կարող է համեմատվել սեփական արարքների դրական արդյունքների հետ: Երբ ցանկացել եք ինչ-որ բան, ակտիվություն եք ցուցաբերել այդ ուղղությամբ և հասել Ձեզ ձեռնտու արդյունքի: Միշտ շատ կարևոր է հասկանալ սեփական ցանկություններն ու գործողություններ ձեռնարկել դրանց հասնելու համար: Կարևոր է ճիշտ գնահատել ռիսկերն ու Ձեր հնարավորությունները: Բացասական արդյունքները միշտ էլ դրականներից ավելի շատ կլինեն, բայց դա չպետք է Ձեզ կանգնեցնի: Բացասական արդյունքը պետք է դաս լինի: Կարևոր է վերլուծել սեփական անհաջողությունները, եզրակացություններ անել, ինքներդ փոխվել և նոր փորձեր ձեռնարկել:
6. Գտե՛ք պատճառը: Որոշեք այն պատճառներն, ըստ որոնց Ձեզ անհրաժեշտ է ինքնավստահություն ձեռք բերել: Ի՞նչ կփոխվի, եթե Ձեր վստահությունն աճի: Կփոխվե՞ն արդյոք Ձեր աշխատանքային դիրքը կամ շրջապատի հետ հարաբերությունները: Պատճառները պետք է բավարար խթան հանդիսանան՝ Ձեր մեջ փոփոխվելու ցանկությունը պահպանելու համար:
7. Ուրիշների հանդեպ վերաբերմունքը: Ուշադիր եղեք ուրիշների հանդեպ: Եթե տեսնում եք, որ Ձեր զրուցակիցն անվստահ է իրեն պահում, փորձեք ոգևորել նրան: Նման վերաբերմունքը Ձեզ թույլ կտա ավելի ինքնավստահ դառնալ: