Դու հանդիպել ես այն  միակին, ում հետ ուզում ես կյանքդ կապել, բայց…  Հաճախ պատահում է, երբ մենք ժամանակից առաջ  ենք ընկնում,  մտովի պատկերացնում մեր ապագան, ամեն ինչ կառուցում, իսկ նա անգամ չի էլ մտածում լուրջ հարաբերությունների մասին: Այստեղ պետք է զգույշ գործել, որպեսզի հակառակ ազդեցությունը չստանանք` փորձելով ստիպել նրան լրջացնել հարաբերությունները: Երբ նա զգա, որ դու ճնշում ես իրեն քո պահանջներով, հավատա՝ դու կկորցնես անգամ այն փոքրիկ տեղը նրա կյանքում, որն ունեիր մինչև այդ: Մի քանի խորհուրդ LN-ից  այն լեդիներին, որոնք կանգնած են  հարաբերությունները լրջացնելու խնդրի առաջ…

Եղիր ինքնաբավ:  Եթե դու հիմա տառապում ես ու մտածում, որ եթե ընկեր ունենայիր, ամեն ինչ այլ կերպ կլիներ, ապա պետք է պայքարել այս մտքերի դեմ:  Շատ քչերն են սիրահարվում այնպիսի աղջիկների, ովքեր ճահիճ են ստեղծել իրենց շուրջը:  Եթե դու անկեղծորեն վայելում ես կյանքդ անգամ առանց տղամարդու, ապա հեշտությամբ կգտնես քո կեսին: 

Դարձրեք ձեր կյանքը հետաքրքիր, շնորհակալ եղեք այն ամենի համար, ինչ ունեք:

Ինքնավստահ եղիր: Ոչ ոք քեզ գեղեցիկ ու գրավիչ չի համարի, եթե դու ինքդ այդպես չկարծես:  Պետք չէ մտատանջվել՝ արդյոք նրան դուր կգա քո վարած կյանքը, քո շրջապատը, թե ոչ: Միշտ մտածիր, որ դու իսկական պարգև ես անգամ հերոսի համար:

Էլեգանտ, գեղեցիկ, բայց բնական:  Կատարված հարցումների մեծ մասը ցույց են տալիս, որ տղամարդկանց 67-80%-ը սիրում են հասարակ աղջիկների՝ սովորական, առօրեական կերպարում: Եվ միայն չնչին տոկոսն է պատասխանել, որ կնախընտրեր սեքսուալ, աչքի ընկնող աղջիկների:  Այստեղից պետք է հետևություն անել: Պետք է մի կողմ դնել վուլգար, չափից դուրս աչք ծակող, շատ բաց հագուստը և վառ դիմահարդարումը:

Եթե դուք  զույգ չեք, ուրեմն դու ազատ ես:  Թող կոպիտ չհնչի, բայց հանդիպումը  շոփինգի պես բան է, որտեղ յուրաքանչյուրը ցուցադրում է իր «ապրանքը»:  Դու ազատորեն կարող ես մի քանի անգամ շոփինգի գնալ, մինչև գտնես քո ուզածը:

Կինը պետք է մի փոքր առեղծված ունենա իր մեջ:  Հոգեբանները միշտ էլ պնդել են, որ անկեղծանալ տղամարդու հետ մինչև վերջ չի կարելի: Մի բացեք ձեր բոլոր խաղաքարտերը: Թող միշտ ինչ-որ բան նրա համար հանելուկ մնա: Անգամ եթե ամուսնացած եք, թույլ տվեք նրան օր օրի նորանոր բաներ հայտնաբերել ձեր մեջ:

Հին օրենքը մինչ օրս աշխատում է:  Ամենակայուն սիրային հարաբերությունները ծագում են հարազատ հոգիների միջև:  Հիանալի կլինի, եթե ձեր հարաբերությունները սկսվեն հասարակ ընկերությունից: Հետաձգեք սեքսը, որքան հնարավոր է.  սկզբում հասկացեք իրար հոգով: Համոզվիր, որ նա այն միակն է, ում հետ կարող ես ամբողջ կյանքդ ապրել և չհոգնել:  Իսկ դրա համար նախընտրելի է ընկերություն անել նրա հետ  նախքան հարաբերություններ սկսելը:

 Ամենուրեք տես դրականը: Հերիք է դժգոհես ճակատագրից, անհաջողություններից. դու միայն բարդացնում ես կյանքդ: Մի տրտնջա, դու ամեն ինչ կարող ես փոխել:  Եթե դու ինքդ քեզ քննադատաբար ես մոտենում, ցածրացնում ինքնագնահատականդ, ապա նույնը սպասիր նաև շրջապատից: Եվ արդյունքում իսկապես կառաջանա խնդիր դժգոհելու, ամեն ինչից հիասթափվելու: Վերակառուցիր կյանքդ՝ սկսելով քեզնից: Եթե կարծում ես, որ արժանի ես սիրո, ապա վաղ թե ուշ գտնելու ես այն իսկական սերը, որին երկար ժամանակ սպասում ես: Երբեք ուշ չէ, այլ հակառակը` ճիշտ ժամանակն է: 

Աղբյուր` LADYNEWS.am