Ծնված օրից մինչեւ 14 տարեկանը կնոջն առաջին հերթին անհրաժեշտ են լավ ծնողներ: 14-40 տարեկանում առաջնահերթությունը լավ տեսք ունենալն է, 40-60 տարեկանում նա հատկապես ուշադրության կարիք է զգում, իսկ ահա 60-ից հետո կնոջը նախեւառաջ փող է պետք… Կնոջ կարիքների մասին վերջերս լսած այս պնդման հետ լիովին համամիտ եմ' մի բացառությամբ. կնոջը փողը շատ ավելի շուտ էլ է պետք:

ՄԵՐԻ ՔԵՅ

«Մերի Քեյ կոսմետիկա» (Mary Kay Cosmetics) ընկերության ստեղծման գաղափարը, ինչպես մեծ հաջողությունների այլ պատմություններում, ծնվել է անսպասելի: Մի օր բարկացած Մերի Քեյը (Mary Kay) որոշեց գիրք գրել այն դժվարությունների մասին, որոնց կանայք բախվում են աշխատավայրում, եւ որոնց պատճառն արական սեռի շովինիզմն է: Երբ, խոհանոցի սեղանի մոտ նստած, նա գրքի պլանն էր կազմում, առաջնահերթությունների երկու ցանկ ստացավ: Առաջինն ընդգրկում էր բացասական փորձի այն օրինակները, որ նա ունեցել էր սպասարկման ոլորտում քսանհինգամյա կարիերայի ընթացքում: Երկրորդ ցանկում հայտնվեցին այն պայմանները, որոնք անհրաժեշտ են իդեալական կազմակերպություն ունենալու համար, որը աշխատելու հնարավորություն կտա հատկապես ամուսնացած, երեխա ունեցող կնոջը: Մերի Քեյը նկատեց, որ ինքն անուղղակիորեն կազմում է այն ընկերության մոդելը, որը գրավիչ կլինի շատ կանանց համար: Նա հետաձգեց գիրք գրելու գաղափարը եւ անցավ իր պատկերացրած կազմակերպության բիզնես պլանը կազմելուն:

Հետագայում Քեյն իր հարցազրույցներից մեկում պատմել է, որ «Մերի Քեյ կոսմետիկա» -ն ծնվել է հենց այդ պահին: «Ես ցանկանում էի ստեղծել մի ընկերություն, որը հնարավորություն կտա կանանց, հատկապես ընտանիք եւ դեռահաս երեխաներ ունեցող կանանց ստեղծել սեփական կարիերան: Դա չպետք է լինի խիստ կանոնների աշխարհ, ընկերության խորհրդատուները պետք է ազատ լինեն եւ հնարավորություն ունենան տնօրինելու սեփական ժամանակը: Զբաղվածության այդ տարբերակը հնարավորություն կտա կնոջն առաջին տեղում դնել ընտանիքը, ինչը բնական է: Բազմաթիվ կանանց անհանգստացնում է այն հանգամանքը, որ իրենք չեն կարող աշխատել, եթե խնդիրներ ունեն տանը» ,- մանրամասնել է Մերի Քեյը:

Քսաներորդ դարի ամենահաջողակ կանանցից մեկը ծնվել է ԱՄՆ Տեխաս նահանգի Հոթ Ուելս քաղաքում' ոչ հեռու նշանավոր Հյուսթոնից: Երբ Մերին երկու տարեկան էր , հայրը հիվանդացավ թոքախտով, եւ նրա հետագա կյանքն անցավ հիվանդանոցներում կամ տանը' անկողնուն գամված: Ողջ հոգսը ընտանիքի մոր ուսերին էր: Նա աշխատում էր միաժամանակ բուժքույր եւ պահակ ռեստորանում, որի սեփականատերը դարձավ շուտով: Հոր խնամքով տանը զբաղվում էր հիմնականում փոքրիկ Մերին: Երբ յոթ տարեկան աղջիկն օրվա ընթացքում տնային հոգսերի վերաբերյալ մոր հետ խորհրդակցելու անհրաժեշտություն էր զգում, զանգում էր նրան, իսկ վերջինս քաջալերում էր դժվար դրության մեջ հայտնված դստերը.«Սիրելի’ս, դու կարող ես, ամեն ինչ էլ կստացվի»: Այս խոսքերը Մերի Քեյի համար ուղենիշ դարձան ողջ կյանքում: Պատահական չէ, որ նա գերազանց էր սովորում դպրոցում եւ հրաշալի գլուխ հանում կյանքում հանդիպող դժվարություններից դեռեւս դպրոցական տարիքից: Մերին երազում էր դառնալ բուժքույր, ինչպես մայրը, կամ բժիշկ: Այդպես էլ կլիներ, եթե կյանքը չխառներ բավականին վաղ տարիքում իրեն ամուսնական հոգսերի մեջ գցած Մերի Քեյի խաղաքարտերը…

Նա ամուսնացավ տասնյոթ տարեկանում: Սակայն, երիտասարդ երգիչ Բեն Ռոջերսը, որին Մերին անվանում էր Հյուսթոնի Էլվիս Փրեսլի, ութ տարվա համատեղ կյանքից հետո լքեց նրան եւ փախավ սիրուհու հետ: Այդ ժամանակ նրանք արդեն երեք երեխա ունեին, Մերին մատուցողուհի էր աշխատում մոր ռեստորանում եւ կես տարի էր, ինչ ընդունվել էր բժշկական քոլեջ: Ամուսնու անակնկալ անհետացումից փաստի առաջ կանգնած կինը ստիպված էր չշարունակել կրթությունը եւ փնտրել մի աշխատանքը, որը հնարավորություն կտար ամողջովին հոգալ երեխաների կարիքները: Դա վաճառողուհու աշխատանքն էր. Մերին միաժամանակ ամեն ինչ այնպես դասավորեց, որ կարողանա տանը լինել երեխաների' դպրոցից վերադառնալու ժամին:

Մի անգամ նրանց տուն են զանգում եւ առաջարկում գնել նոր լույս տեսած մանկական հանրագիտարան: Մերիի ֆինանսական դրությունն այդպիսի «շքեղություն» թույլ չէր տա նրան, բայց երեք երեխաների մայրիկն այնքան էր ուզում գնել հանրագիտարանը, որ հարցրեց. «Իսկ հնարավո՞ր չէ այն ձեռք բերել այլ տարբերակով» : Եվ Իդա Բլեյկ անունով կինը խոստացավ Մերիին անվճար տալ հանրագիտարանը, եթե նա եւս տասը գնորդ գտնի… Քեյը մեկ- երկու օրվա ընթացքում գտավ այդ տասը գնորդին եւ հետո միայն պարզեց, որ դա Բլեյկի գլխավորած կազմակերպության աշխատողների մեկ ամսվա պլանն է: Իդա Բլեյկն անմիջապես գնահատեց Մերի Քեյի' մարդկանց համոզելու բնատուր տաղանդը եւ նրան աշխատանք առաջարկեց' դառնալով ապագա միլիարդատիրոջ առաջին բիզնես-խորհրդատուն, ուսուցիչը: Այդ օրից ի վեր Մերին քսանհինգ տարի անցկացրեց վաճառքի ոլորտում, դարձավ առաջնակարգ մասնագետ, սկսեց դասավանդել սկսնակներին: Սակայն Մերի Քեյի համար ավելի ու ավելի անհանդուրժելի էր դառնում այն երեւույթը, երբ նույն աշխատանքը կատարող տղամարդիկ ավելի գնահատված են, շատ ավելի լավ են վաստակում, իսկ կանայք շարունակում են մնալ երկու քարի արանքում' տնային հոգսերի եւ կարիերայի: Նա որոշեց թողնել ամեն բան եւ մշակել կանոններ, որոնք կփոխեն գործարար աշխարհը…

Տարիների խնայողությունները՝ 5000 դոլլար ներդնելով' 1963 թ. Մերի Քեյը բացեց իր երազանքների ընկերությունը' « Մերի Քեյ կոսմետիկա» -ն։ Երբ տարիներ հետո նրան հարցրեցին' արդյոք չէր վախենում նախաձեռնության ռիսկայնությունից, հաջողության հասած լեդին պատասխանեց. «Ոչ մի ռիսկի մասին էլ խոսք չկար: Ես նույնիսկ մտածել չէի կարող, որ ձախողում կլինի: Դա ուղղակի անհնար էր»: Իր մասին նա նշում էր, որ միշտ գործել է վճռականությամբ, խանդավառությամբ, դրական տրամադրվածությամբ լցված, ավելի կոնկրետ' Գանդիի ոճով' «Գնա' եւ արա'' չսպասելով մինչեւ կստանաս»:

«Մերի Քեյ կոսմետիկա» -ն 1968 թվականին դարձավ բաժնետիրական ընկերություն, իսկ նրա հիմնադիրը' միլիոնատեր: «Հյուսթոնցի փոքրիկ, աղքատ աղջիկն արե’ց դա: Բայց ես ինքս ինձ չմտածեցի. «Վա~տ չէ: Ես միլիոնատեր եմ եւ ահա արդեն երջանիկ եմ» : Մի երգում նման բառեր կան' « Երջանկությունը տարբեր բան է նշանակում տարբեր մարդկանց համար»:Կցանկանայի կիսել ձեզ հետ երջանկության իմ բանաձեւը: Ինձ համար երջանկությունն առաջին հերթին սիրելի աշխատանք ունենալն է, մի աշխատանք, որն ուզում ես անել, եթե անգամ դրա համար չեն վճարի: Երկրորդը մեկին սիրելն է, իսկ երրորդը' ինչ-որ բանի անհամբերությամբ սպասելը» ,- հիշողություններում նշել է Քեյը:

Մերի Քեյի փորձը ցույց է տալիս, որ յուրաքանչյուրը կարող է հասնել իր երազանքի իրագործմանը, եթե անմտորեն չհետեւի ընդունված կանոններին, բիզնեսի գիտակների սահմանումներին: 1989 թվականին ընկերության շահույթը գերազանցեց մեկ միլիարդ դոլարը:

«Մերի Քեյ կոսմետիկա» ընկերության այլաբանական խորհրդանիշը ադամանդյա իշամեղուն է, որին այնքան սիրում էր լեդի Քեյը. «Իր փոքրիկ թեւերի եւ ծանր մարմնի պատճառով, իշամեղուն, բոլոր կանոններով, պիտի որ չթռչեր: Բայց նա չգիտեր այդ մասին եւ խորամանկություն ունեցավ ինչ-որ կերպ թռչելու... » :

Մերի Քեյը վախճանվեց 2001 թվականին' թողնելով ոչ միայն միջազգային հեղինակություն, մեծ կարողություններ ունեցող ընկերություն, այլեւ իմաստնության, կյանքի փորձի ուսանելի դասեր, որոնք այսօր էլ ոգեշնչում են շատ կանանց կառուցել այն կյանքը, որին արժանի են…

Աստված ստեղծեց աշխարհն ու ասաց. «Լավ է» : Ապա նա ստեղծեց տղամարդուն եւ ասաց. «Սա էլ է լավ, բայց ես կարող եմ ավելին» : Եվ այդ ժամանակ նա ստեղծեց կնոջը:

Նպատա'կ ունեցիր եւ ամեն օր ինչ-որ բան արա' նրան հասնելու համար: Մի’ մտածիր, որ պետք է անես հենց « լավագունը, որ կարող ես» : Դրանով դու միայն խորամանկում ես եւ տեղ թողնում ներողություն խնդրելու համար: Ունեցի’ր գործողությունների պլան, որը կմատնանշի ամեն օրվա թիրախդ:

Մի սահմանափակիր քեզ: Դու կարող ես այնքան առաջ գնալ, ինչքան քո միտքը թույլ է տալիս: Հիշի'ր, որ ինչին հավատում ես, կարող ես նվաճել:

Կարծում եմ' մարդուն պետք է խրախուսել յուրաքանչյուր հնարավոր դեպքում: Դա նույնն է նրա համար, ինչ ջուրը' բույսի:

Ամեն մեկի վզից անտեսանելի ցուցանակ է կախված, որի վրա գրված է. « Այնպե'ս արա, որ ինձ կարեւոր զգամ» : Մարդկանց հետ աշխատելիս սրա մասին մի' մոռացեք:

http://ladynews.am