Ժամեր անց Լատվիայի Յուրմալա քաղաքում կմեկնարկի երիտասարդ կատարողների ''Նոր ալիք'' 11-րդ միջազգային մրցույթը, որին մասնակցում են 16 կատարողներ 14 երկրներից:

Փառատոնի ամբողջ ընթացքում Յուրմալայի բեմում ելույթ կունենան ո՛չ միայն մասնակիցները. ինչպես միշտ, ներկայացվելու են շոու-բիզնեսի հայտնի կատարողների ելույթներ ևս. նրանց թվում են բրիտանացի երգիչ Թոմ Ջոնսը, երգչուհիներ Նելլի Ֆուրտրադոն, կորեացի օպերային երգչուհի Սումի Յոն:

Ինչպես հայտնի է` այս տարի ''Նոր ալիք'' մրցույթում Հայաստանը ներկայացնում է երգիչ Սուրեն Առուստամյանը:

ՄԱՄՈՒԼ.am լրատվականի թղթակցի հետ զրույցում մրցույթի հայաստանյան PR պատասխանատու Մհեր Բաղդասարյանն ասել է, որ Սուրեն Առուստամյանի տրամադրությունը շատ բարձր է, ու մեր երգիչը ֆավորիտների շարքում է:

''Սուրեն Առուստամյանի հետ Յուրմալա են մեկնել մրցույթի հայաստանյան պրոդյուսեր Իրինա Վարդանյանը և կազմակերպչական խումբը, ովքեր կնկարահանեն ու հայ հանդիսատեսին կներկայացնեն մրցույթի ողջ ընթացքը: Իրենց նախաձեռնությամբ Յուրմալայում են նաև Նազենի Հովհաննիսյանը, Սոֆի Մխեյանը, Ավետ Բարսեղյանը և այլք'':

Մհեր Բաղդասարյանը նշել է նաև, որ Սուրենը կներկայանա երեք կատեգորիաներում. մրցութային առաջին օրը կներկայացնի Էրիկ Քլեփթոնի ''Change The World'' երգը, մրցույթի երկրորդ օրն` Անդրեի ''Իմ սերը քեզ'' երգը, իսկ մրցութային երրորդ օրը նա կկատարի Brandon Stone-ի Next to you երգը:
Դե ինչ, հաջողություններ ու հաղթանակ մաղթենք մեր մասնակցին:

mamul.am