Էպատաժային Ջուսը այս անգամ մեզ համար բացահայտում է իր ամենանուրբ, աղջկական ու գեղեցիկ պատմության մանրամասները: Իր առաջին սիրո վառ հիշողություններով երգչուհին կիսվեց մեզ հետ:

Երբ եք առաջին անգամ սիրահարվել

Առաջին անգամ սիրահարվել եմ մանկապարտեզում, կապուտաչյա մի տղայի, որի անունը Սերյոժա էր: Նա ինձ համար շատ գեղեցիկ էր ու տարբերվում էր բոլոր տղաներից:

Ինչ վերջաբան ունեցավ ձեր առաջին սիրո պատմությունը

Ասեմ, որ Սերյոժան ինձ վրա ընդհանրապես ուշադրություն չէր դարձնում, եւ անտարբեր էր իմ հանդեպ: Ես գժի պես սիրում էի նրան, բայց ցույց չէի տալիս. ամաչում էի:

Մի գնացք ունեի, որի վրա գեղեցիկ ու գունավոր կլորիկներ կային, մայրս էր բերել ինձ համար Գերմանիայից: Մի օր դա հետս մանակապարտեզ տարա:

Եւ օհ՜ տեր իմ…:

Սերյոժան առաջին անգամ ինձ վրա ուշադրություն դարձրեց: Մոտեցավ խաղալիքիս ու ասաց -ախ՜ այս ինչ կլորիկներ են:

Ես նվիրեցի նրան խաղալիքիս բոլոր կլորիկները` պայմանով որ զբոսանքի դուրս գալուց նա բռնի ձեռքս: Ես իհարկե երջանիկ էի այդ օրը, չնայած որ նրան իրականում գրավել էր իմ խաղալիքը, այլ ոչ թե ես, բայց ես ուրախ էի, որ գոնե մեկ անգամ բռնել էի նրա ձեռքը: Այս տխուր պատմությանը ես հետագայում անդրադարձա իմ եւ Գուժի < stop> երգի տեսահոլովակում:

Ինչով է տարբերվում ըստ ձեզ սիրելը սիրահարված լինելուց

Կարծում եմ` սիրահարվածությունը կարող է անցնել առանց հետք թողնելու: Բացի այդ, դա պարազապես կիրք է, նման դեպքերում կրքի դերն ավելի մեծ է: Իսկ սերը ավելի խորը զգացմունք է: Այդ ժամանակ դու ցանկանում ես դիմացինիդ տալ ամենալավը, դու ուզում ես, որ նա երջանիկ լինի : Կարծում եմ` հիմա սեր ասվածը դիֆիցիտ է:

Արդյոք տարիքի հետ փոխվում է մարդու սիրելու կարողությունը

Այո, կարծում եմ` տարիքի հետ ավելի բծախնդիր ու խելացի դառնալը ազդում է նաեւ սիրելու կարողության վրա:

Մոռացվում է արդյոք առաջին սերը

Եթե ես պատմեցի իմ առաջին սիրո մասին, հիշելով բոլոր մանրամասները, ապա՝ ոչ:

Ինչ է սերը ըստ Ջուսի

Սերը դա երջանկություն է, հարգանք եւ կյանքի շարժիչ ուժ: Սերը տալիս է թևեր ու դրական լիցքեր, եթե իհարկե այն առողջ է, փոխադարձ ու առանց խանդի տեսակների:

Փոխադարձ սեր՝ դա է երջանկությունը:

Հայկուհի Ջանիկյան

LoveYou.am