Գերմանացի դերասան Կլաուս Կինսկուն մահից 20 տարի անց մեղադրում են մանկապղծության մեջ։ ВВС-ը հաղորդում է, որ հոր հանցավոր հակումների մասին հայտարարել է նրա ավագ դուստրը՝ Պոլան։ Նա պնդում է, որ իրեն հինգ տարեկանից այլասերել է հայրը, եւ նա որոշել է խախտել լռությունը, քանի որ այլեւս ուժ չունի հաշտվելու նրա՝ մեծն դերասանի պահպանված համբավի հետ։

Դերասանի բուռն անձնական կյանքի մասին միշտ էլ հայտնի է եղել, սակայն մանկապղծության նրա հակումների մասին նախկինում չի իմացվել։ Թեեւ, ըստ դերասանի կենսագիր Քրիստիան Դեւիդի ВВС – ին տված տեղեկության, Կինսկու՝ իր դուստր Պոլայի հետ ունեցած հարաբերությունների մասին լուրեր ժամանակին շրջել են։ «Եվրոպայում եւ հատկապես Գերմանիայում Կլաուս Կինսկին երկրպագուների լուրջ բանակ ունի, շատերն են նրան կուռք համարում։ Մոտակա շաբաթների ու ամիսների ընթացքում կտեսնենք, արդյո՞ք դա կփոխվի», - նշել է Դեւիդը։

Ավելացնենք, որ Կինսկին նկարահանվել է 1970-80-ական թվականներին Վերներ Հերցոգի նկարահանած մի շարք հայտնի արեւմտագերմանական ֆիլմերում, որոնց շարքում են «Ագիրե, Աստծո զայրույթ», «Նոսֆերատու. գիշերվա ուրվականը» եւ «Ֆիցկարալդոն»։