Հայաստանի ծանրամարտի տղամարդկանց հավաքականն ավարտեց ելույթները Լոնդոնի ամառային օլիմպիական խաղերում:

Այսօր ասպարեզ դուրս եկավ 94կգ քաշային Նորայր Վարդանյանը: 25-ամյա մարզիկը մեդալի իրական հավակնորդ չէր, սակայն սպասվում էր, որ կփորձի միջամտել առաջատարների պայքարին:

Պոկում վարժությունը ցույց տվեց, որ Նորայրը դեռ պատրաստ չէ լուրջ կիլոգրամներ բարձրացնել: Վարդանյանը 170կգ-ով հանգրվանեց 11-րդ տեղում: Հրում վարժությունում ևս հայ ծանրորդը համեստ ելույթ ունեցավ՝ բարձրացնելով 210կգ: Երկամարտի 380կգ արդյունքով Նորայր Վարդանյանը հանգրվանեց 11-րդ տեղում:

Ամեն դեպքում Նորայրն այս Օլիմպիադայում Հայաստանը ներկայացնող առաջին ծանրորդն է, ով խուսափեց 0-ից:

94կգ քաշային կարգում ոսկե մեդալի արժանացավ Ղազախստանի ներկայացուցիչ Իլյա Իլյինը, ով երկամարտի 418կգ արդյունքով սահմանեց Օլիմպիական նոր ռեկորդ:

Վաղը՝ օգոստոսի 5-ին, ասպարեզ դուրս կգա Հռիփսիմե Խուրշուդյանը (75+), ով ծանրամարտում Հայաստանի վերջին ներկայացուցիչն է: